У гарадах Расіі пачалі з’яўляцца шыльды з пазначэннем бамбасховішчаў
Улады Растова-на-Доне, Белгарада, Бранска, Курска і Новакузнецка павесілі на вуліцах таблічкі, на якіх пазначана размяшчэнне бамбасховішчаў
28.11.2022 / 16:14
На працягу мінулага тыдня стала вядома пра з'яўленне такіх шыльдаў у гарадах расійскіх рэгіёнаў, што мяжуюць з Украінай, заўважыла расійская «Медиазона».
У Растове-на-Доне такія ўказальнікі размясцілі ў цэнтры горада. Паведамляецца таксама, што яшчэ ў верасні ўлады гарадоў і станіц краю запатрабавалі ў кіраўнікоў кампаній ачысціць падвальныя памяшканні шматкватэрных дамоў для ўладкавання месцаў, дзе можна схавацца.
У Белгарадзе на сцены дамоў напрамкі, дзе шукаць бамбасховішчы, пачалі наносіць з дапамогай балончыкаў і трафарэтаў. Усяго да канца лістапада плануюць размясціць 700 такіх ўказальнікаў. Улады просяць гараджан «захоўваць спакой» і паведамляюць, што яны «працуюць на апярэджанне».
У Клінцах і Бранску ўказальнікі пачалі з'яўляцца яшчэ ў жніўні. У канцы кастрычніка губернатар вобласці Аляксандр Багамаз даручыў падначаленым праверыць стан бамбасховішчаў.