У Гродне адкрыўся першы крыты скейт-парк
Скейт-парк Monkey Park адкрыўся ў адным з былых вытворчых будынкаў па вуліцы Курчатава ў Гродне. На 700 «квадратах» размясцілася прафесійнае абсталяванне для выканання розных трукаў на скейтах, роліках, самакаце або ровары, піша grodno.news.
22.11.2022 / 17:10
«Папулярнасць такіх відаў спорту расце. Скейтбордынг, напрыклад, ужо ўключаны ў праграму алімпіяды. І гродзенская моладзь ад трэндаў не адстае. Думаю, многія бачылі, як падлеткі ў якасці трамплінаў выкарыстоўваюць розныя элементы гарадской інфраструктуры. Гэта і небяспечна для саміх тых, хто катаецца, плюс наносіць шкоду будынкам. Таму мы і прынялі рашэнне стварыць прастору для экстрэмальных відаў спорту, дзе можна было б займацца з камфортам і бяспечна», — расказваюць у скейт-парку.
Галоўны элемент парку — рампа. Таксама ўстаноўленыя грайнбокс, кікеры і іншыя фігуры, колькасць якіх пастаянна павялічваецца.
Стваральнікі скейт-парку адзначаюць, што нічога падобнага ў Гродне раней не было. Адзін час, праўда, дзейнічала пляцоўка пад Старым мостам, але ўмовы там былі далёка не ідэальнымі.
Усё абсталяванне сертыфікаванае Беларускай федэрацыяй спорту на роліках і скейтбордах, таму ў перспектыве тут могуць праводзіцца і афіцыйныя спаборніцтвы.