У палку Каліноўскага зʼявілася падраздзяленне БПЛА імя Мікіты Крыўцова
Паводле паведамлення прэсавай службы, у палку Каліноўскага зʼявілася падраздзяленне БПЛА, названае ў гонар загінулага падчас пратэстаў 2020 года футбольнага фаната з Маладзечна Мікіты Крыўцова.
19.11.2022 / 19:19
Мікіта Крыўцоў
Як паведамляе прэс-служба палка, хлопцы праводзяць выведку, карэкціроўку агню і бамбардзіроўку варожых пазіцый і тэхнікі.
У баі, відэа якога публікуе полк, падраздзяленне вылічыла расійскія танкі, дало каардынаты артылерыі і скарэктавала агонь, дзякуючы чаму былі знішчаны два танкі.
«Яшчэ два танкі ворага палкавое падраздзяленне БПЛА Крыўцова разбамбіла сваімі сіламі», — паведамляе прэс-служба палка. — Усяго за бой было знішчана 30 адзінак пяхоты акупантаў».
Мікіта Крыўцоў — футбольны фанат, удзельнік акцый пратэсту пасля прэзідэнцкіх выбараў 2020 года. Яго знайшлі павешаным пад Мінскам. СК адмовіўся распачынаць крымінальную справу. Родныя, як і шмат іншых людзей, не вераць у самагубства Крыўцова.