Darja Šmanaj atrymała aficyjnaje pryznačeńnie
Darja Šmanaj pryznačanaja daradcaj-pasłańnicaj pasolstva Biełarusi ŭ Rasii. Pastanovu 24 kastryčnika padpisaŭ premjer-ministr Raman Hałoŭčanka, dakumient apublikavany na Nacyjanalnym pravavym internet-partale, piša Reform.by.
26.10.2022 / 00:54
Darja Šmanaj. Fota: VKontaktie
U ŚMI Šmanaj nazyvali «kultavaj pamočnicaj» Łukašenki minułaha dziesiacihoddzia, jana była adzin čas načalnicaj addzieła dziaržaŭnaha pratakoła pry Łukašenku. Viadomy vypadak, kali Łukašenka navat pryludna prapanoŭvaŭ jaje pacałavać kolišniamu prezidentu Kazachstana Nursułtanu Nazarbajevu.
Taksama jana viadomaja siabroŭstvam z pres-sakratarkaj Łukašenki Natallaj Ejsmant i jaho favarytam Dźmitryjem Baskavym. Ich razam bačyli padčas nabiehaŭ na dvary z pratesnaj aktyŭnaściu ŭ 2020 hodzie. Mienavita ŭ adzin z takich rejdaŭ byŭ zabity Raman Bandarenka, žychar «Płoščy pieramienaŭ» u Minsku.
U pačatku 2020 hoda Darja Šmanaj źnikła z atačeńnia Łukašenki, i, miarkujučy pa tym, što była členam vybarčaj kamisii ŭ pasolstvie ŭ Maskvie, pracavała niedzie ŭ rasijskaj stalicy, ale nieviadoma dzie i kim. Paśla jaje niekalki razoŭ bačyli pobač z Łukašenkam, apošni raz — 28 vieraśnia padčas jahonaha niečakanaha vizitu ŭ abchazskuju Picundu.