Baza: Rasijskich mužčyn, jakija padlahajuć mabilizacyi, ciapier nie vypuskajuć ź Biełarusi
Pa słovach adnaho z supracoŭnikaŭ Minskaha aeraporta, abmiežavańni pačali dziejničać z 20 kastryčnika, a da hetaha nibyta ŭsich mužčyn vypuskali biez prablem. Pavodle infarmacyi vydańnia Baza, tolki za siońnia z rejsaŭ ź Minska źniali 11 rasijan.
21.10.2022 / 22:38
Pa źviestkach Baza, 23-hadovy Hleb z Sankt-Pieciarburha sprabavaŭ pakinuć Rasiju ŭžo treci raz. Spačatku jaho nie puścili praź miažu ŭ aeraporcie Damadziedava, kali jon sprabavaŭ palacieć u Dubaj. Zatym źniali z aŭtobusa, jaki jechaŭ u Biełaruś — pamiežniki skazali Hlebu, što jon znachodzicca ŭ śpisach i nie moža pakinuć krainu.
Siońnia chłopcu ŭdałosia pakinuć Rasiju — praz abchadnyja ściežki jon narešcie trapiŭ na terytoryju Biełarusi i dabraŭsia da Minska, adkul u jaho byŭ zapłanavany rejs u Turcyju. Adnak u samalot jaho nie puścili: supracoŭnik pamiežnaj słužby spasłaŭsia na punkt 4 artykuła 6 pahadnieńnia pamiž Biełaruśsiu i Rasijaj ab zabieśpiačeńni pravoŭ hramadzian na svabodu pieramiaščeńnia i zabaraniŭ jamu vyjezd.