Ціханоўская: Кожны, каго пераследаваў рэжым, сапраўдныя героі Беларусі
Святлана Ціханоўская пракаментавала завядзенне супраць яе і яе паплечнікаў новых крымінальных спраў, а таксама перспектыву завочнага суда
21.10.2022 / 14:27
Аб пачатку спецыяльнай вытворчасці супраць Святланы Ціханоўскай, Паўла Латушкі, Вольгі Кавальковай, Сяргея Дылеўскага і Марыі Мароз СК адвясціў сёння. Над імі павінны прайсці завочныя суды.
«Мы сталі прывыкаць да пастаянных абвінавачванняў, крымінальных справаў, статусаў «экстрэмістаў» і «тэрарыстаў». Што я магу сказаць пра гэта? Я толькі хачу падтрымаць усіх людзей, якія апынуліся ў гэтых спісах. Дзякуй вам усім за вашую працу. Дзякуй за тое, што мы разам. Дзякуй за тое, што вас не зламаць. Кожны, каго пераследаваў ці пераследуе рэжым, — памятайце: вы сапраўдныя героі Беларусі», — заявіла палітык.
«Я ведаю, што ў гэтага вялізны кошт. Але аднойчы ўсе гэтыя прыдуманыя крымінальныя справы будуць адмененыя. А гонар і сумленне — гэта тое, што застаецца назаўжды», — дадала Ціханоўская.