Мінабароны: Тэхніка ў Расію вывозіцца для мадэрнізацыі, а да нас вязуць новую
Беларускае Міністэрства абароны адрэагавала на шматлікія паведамленні пра вываз з Беларусі ў Расію танкаў і іншай вайсковай тэхнікі і паспрабавала гэта патлумачыць. Начальнік упраўлення развіцця сістэм узбраення Узброеных сілаў Беларусі палкоўнік Сяргей Сахарук заявіў, што ў РФ беларуская тэхніка адпраўляецца для мадэрнізацыі, а наўзамен у нашу краіну пастаўляецца новая.
20.10.2022 / 16:35
Сяргей Сахарук. Скрыншот з відэа
Сахарук адзначыў, што абнаўленне тэхнікі ідзе па некалькіх кірунках. Гэта мадэрнізацыя на прадпрыемствах Беларусі і Расіі, закупка арміяй сучасных беларускіх узораў і пастаўка тэхнікі з прадпрыемстваў Расіі.
Начальнік упраўлення звярнуў увагу, што ў беларускае войска ўжо паступілі бронетранспарцёры БТР-82А, мадэрнізаваныя танкі Т-72Б3 і бронетранспарцёры БТР-70мб, лёгкабраняваныя аўтамабілі «Дракон» і «Кайман» і іншыя ўзоры ўзбраення.
Сахарук растлумачыў, што чым больш у войскі паступае новых узораў тэхнікі, тым больш састарэлых адзінак адпраўляюць у арсеналы і на базы ўзбраення. А там тэхніка мадэрнізуецца, рамантуецца альбо адпраўляецца ў рэзерв.
На дадзены момант паведамляецца пра завяршэнне пераўзбраення механізаваных і дэсантных падраздзяленняў. У працэсе працы вызваліліся БМП, бронетранспарцёры і аўтамабілі савецкай вытворчасці.
У Мінабароны адзначылі, што мадэрнізацыя закране бранятанкавую тэхніку і некаторыя ўзоры аўтамабільнай тэхнікі на базе ваенпрама Расіі.