Cierciel padzialiŭsia strachami łukašystaŭ pierad biełaruskimi vajskoŭcami va Ukrainie
Vystupajučy siońnia na MTZ, Ivan Cierciel vykazaŭ tryvohu z nahody stvareńnia «niezakonnych uzbrojenych farmiravańniaŭ va Ukrainie, Polščy i Litvie, a taksama ŭ Čechii i niekatorych inšych dziaržavach». Pavodle jaho słoŭ, hetyja farmiravańni «finansujucca za košt zamiežnych fondaŭ, jakija vydzialajuć vielizarnyja hrošy dla stvareńnia ŭmoŭ dla destabilizacyi ŭ našaj krainie».
17.10.2022 / 21:56
«Hetyja srodki iduć na tak zvany połk Kalinoŭskaha, a taksama połk «Pahonia». Niekalki sotniaŭ bajevikoŭ u ahulnym liku znachodzicca na terytoryi Ukrainy, kala 80 čałaviek — na terytoryi Polščy i kala 60 — na terytoryi Litvy», — padkreśliŭ kiraŭnik śpiecsłužby.
Pavodle słoŭ Cierciela, hetyja ludzi «aktyŭna rychtujucca, jak jany kažuć, da vyrašalnaj fazy», «niekatoryja ź ich raźličvajuć, što heta budzie listapad hetaha hoda». A raźlik biełaruskich dobraachvotnickich farmiravańniaŭ, na dumku Ciercela, hruntujecca na tym, što «Rasija nie zmoža akazać Biełarusi sadziejničańnie ŭ ramkach sajuźnickich adnosin, pacierpić parazu, vymušana budzie pajści na sastupki.
«I ŭ hetych umovach jany zmohuć zajści z terytoryi Ukrainy na našu terytoryju prykładna na małaryckim kirunku», — skazaŭ Cierciel.
«Hrupoŭka ŭ składzie ad 100 da 300 bajevikoŭ z sučasnym uzbrajeńniem, pavodle ich płanaŭ, pavinna budzie zachapić najbližejšy nasieleny punkt, pažadana rajcentr. Zatym da ich dałučacca najmity ź inšych krain na asnovie dobraachvotnikaŭ z Ukrainy», — skazaŭ Cierciel.
Pavodle jahonaj viersii, hrupoŭka budzie pastupova, nanosiačy straty łukašysckim siłavikam, prasoŭvacca da Minska.
Paśla hetaha jon paŭtaryŭ tezis, ź jakim ciapier jak pad kapirku vystupajuć usie siłaviki padčas sustrečaŭ z hramadskaściu — što, maŭlaŭ, «navat na Zachadzie pryznajuć, što Biełaruś zastajecca vostravam stabilnaści, krainaj, jakoj u takich niaprostych umovach udałosia zachavać mir, vystajać, nie dać mahčymaści pieraviarnuć u nas situacyju». I papiaredziŭ, što «nas čakaje z vami ŭpartaja ciažkaja praca».