Ministr abarony Vialikabrytanii: Paśla niaŭdač va Ukrainie Rasija bolš nie zvyšdziaržava
Na dumku ministra abarony Vialikabrytanii Biena Uolesa, u prezidenta Rasii Uładzimira Pucina z-za šerahu niaŭdač rasijskaj armii ŭ Ukrainie pačynaje źjaŭlacca razumieńnie, što Rasija bolš nie źjaŭlajecca zvyšdziaržavaj. Uolles skazaŭ heta ŭ intervju Evening Standard.
12.10.2022 / 21:47
Bien Uoles
«Jon (Pucin) tolki što vyjaviŭ, što Rasija — nie zvyšdziaržava. Heta klučavy momant. Z adnaho boku, vy pavieryli va ŭłasny chajp, parady, na jakich vy ličyli tanki, ličyli, što jany źjaŭlajucca niepieramožnymi, a na samaj spravie — nie», — skazaŭ Uoles.
Kiraŭnik brytanskaha Minabarony ličyć, što rasijskija siły prajhrajuć va Ukrainie praz «svaje vajennyja mahčymaści» i iłžyvyja «stratehičnyja zdahadki» svajho kiraŭnictva.
«Na kožnym kroku jany niedaaceńvali Ukrainu i pieraaceńvali Rasiju. Ale ŭ Pucina ŭ zahašniku jość miljony ludziej, jakich jon moža zapchnuć u miasarubku biez praviłaŭ, biez pavahi da čałaviečych žyćciaŭ, da niavinnych ludziej i hramadzianskaha nasielnictva», — dadaŭ Uolles.
Jon dadaŭ, što ŭ apošnija dni kontrnastupleńnie Ukrainy ŭ Chiersonskaj vobłaści zapavoliłasia, ale jana ŭsio adno zachoŭvaje pieravahu, tady jak Rasija «sutykajecca z katastrafičnaj strataj bajavoha duchu, drennym abstalavańniem, značnym deficytam bojeprypasaŭ i palityčnaj niestabilnaściu».
«Jaho (Pucina) stratehičnyja zdahadki, padobna, pamyłkovyja va ŭsim. Navat učora (u paniadziełak) abstreł mizernaj kolkaściu rakiet, jakija zastajucca, pa vypadkovych hramadzianskich abjektach, u toj čas jak vy pavinny byli abstrelvać vajskovyja celi, nie źjaŭlajecca stratehičnym abo razumnym vykarystańniem vašych abmiežavanych resursaŭ», — ličyć ministr abarony Vialikabrytanii.