Канапацкая пра амністыю: Гэта праект, а не закон
«Наша Ніва» пасля публікацыі праекта закона аб амністыі паспрабавала ўзяць каментар у Ганны Канапацкай, якая з нядаўняга часу з'яўляецца сувязной рэжыму па пытаннях амністыі. Але канструктыўнай размовы не атрымалася.
12.10.2022 / 20:41
«Апублікавалі закон аб амністыі, мы паглядзелі — няма самых чаканых артыкулаў палітычных. 342 няма, 130 няма, іншых няма», — звярнуў увагу Канапацкай журналіст «Нашай Нівы».
Паколькі сама Канапацкая, як сцвярджала ў папярэдняй размове, праводзіла «вялікую колькасць сустрэч і кансультацыяў па гэтым пытанні з прадстаўнікамі заходняга дыпламатычнага корпуса і іх палітычных колаў», то было цікава даведацца, чым яны заходніх дыпламатаў у такім выпадку хацелі ўразіць. Але Канапацкая разважаць на гэтую тэму аказалася не гатовая.
«Ідзе абмеркаванне. Чытайце ўважліва — гэта праект, а не закон», — адказала яна і паклала трубку.