Jeŭrakamisija rekamiendavała nadać status kandydata na ŭstupleńnie ŭ Jeŭrasajuz Bośnii i Hiercahavinie
Jeŭrakamisija rekamiendavała Jeŭraradzie dać status kandydata na ŭstupleńnie ŭ Jeŭrasajuz Bośnii i Hiercahavinie. Rašeńnie pryniataje z ulikam taho, što ŭ hetaj bałkanskaj krainie budzie zrobleny šerah krokaŭ dla ŭmacavańnia demakratyi, funkcyjanavańnia dziaržaŭnych instytutaŭ, viaršenstva zakona, baraćby z karupcyjaj i arhanizavanaj złačynnaściu, uviedzienyja harantyi svabody ŚMI i kiravańnie mihracyjaj.
12.10.2022 / 16:53
«Siońnia my rekamiendujem Radzie nadać status kandydata Bośnii i Hiercahavinie. My pryŭnosim u hety praces stanoŭčuju dynamiku i spadziavajemsia, što rehijon skarystajecca šancam i praciahnie realizacyju klučavych reformaŭ. My aceńvajem pracu nie tolki partnioraŭ, ale i budučych dziaržaŭ-členaŭ.
Acenki, jakija my robim ciapier, taksama tyčacca taho, jaki Sajuz my chočam bačyć u budučyni. I bačna, što my vierym u jeŭrapiejskuju budučyniu našych partnioraŭ.
Žorstkaje ŭvarvańnie Rasii va Ukrainu nahladna demanstruje važnaść pašyreńnia ES, jakoje nabyvaje novaje hieapalityčnaje značeńnie. Heta doŭhaterminovaja inviestycyja ŭ mir, roskvit i stabilnaść na našym kantyniencie», — zajaviŭ viarchoŭny pradstaŭnik ES pa źniešnich spravach i palitycy biaśpieki Žazep Barel.
Na siońniašni dzień ź dziaržaŭ, jakija ŭtvarylisia na ruinach byłoj Juhasłavii, paŭnapraŭnymi členami Jeŭrasajuza źjaŭlajucca tolki Słavienija i Charvatyja, astatnija ž vykazvajuć hatoŭnaść da jaho dałučycca. Bośnija i Hiercahavina — adna z najbolš prablemnych krain z-za niavyrašanych u joj nacyjanalnych prablem, jakija pahražajuć novymi kanfliktami i navat raspadam krainy.