«Supracoŭnikam amierykanskaha «Makdonaldsa» pakul šancuje mienš». U biełaruskim «Makdonaldsie» stvaryli praŭładny prafsajuz
U addzialeńni «Makdonaldsa» ŭ Maskoŭskim rajonie Minska stvaryli pieršasnuju prafsajuznuju arhanizacyju. U jaje ŭvajšli ažno siem čałaviek. U Fiederacyi prafsajuzaŭ Biełarusi heta padzieju nazvali histaryčnaj.
10.10.2022 / 21:38
Jak paviedamlaje FPB, piaršasnaja arhanizacyja była zarehistravanaja 27 vieraśnia, a siońnia, 10 kastryčnika, pradstaŭniki restarana atrymali paśviedčańnie ab rehistracyi.
U sietcy restaranaŭ chutkaha charčavańnie pracujuć kala 2 tysiač čałaviek. Ź ich u prafsajuz ustupili siamiora.
«Halinovy prafsajuz i Minskaja haradskaja arhanizacyja doŭhija hady płanamierna viaduć pracu pa stvareńni pieršasnych prafsajuzaŭ va ŭsich arhanizacyjach dziaržaŭnaj i niedziaržaŭnaj formaŭ ułasnaści. U tym liku, z «Makdonaldsam».
Bolš za dziesiać hadoŭ išła hetaja praca, doŭhaja, karpatlivaja. I voś, jana pryniesła vyniki»,
— zajaviŭ na cyrymonii ŭručeńnia paśviedčańnia staršynia Minskaj haradskoj arhanizacyi prafsajuzaŭ rabotnikaŭ handlu Alaksiej Kulibaba.
Staršynia Minskaha haradskoha addzialeńnia prafsajuzaŭ Alaksandr Ščakovič pažadaŭ rabotnikam «Makdonaldsa» adčuvać siabie
«častkaj vialikaj prafsajuznaj siamji» i zajaviŭ, što prafsajuz dapamahaje rabotnikam achoŭvać svaje pravy, sočyć, kab usie raśpisvalisia ŭ dakumientach i dapamahaje pradpryjemstvu «ŭlivacca ŭ žyćcio horada».
Pry hetym na prafsajuznych sajcie ci to ź ironijaj, ci to surjozna adznačyli, što
«supracoŭnikam amierykanskaha «Makdonaldsa» pakul šancuje mienš. Rabotniki sietki ŭ ZŠA hadami patrabujuć stvareńnia ŭłasnych prafsajuzaŭ z-za nizkich zarobkaŭ i ciažkich umovaŭ pracy, a kiraŭnictva kampanii zahrazła ŭ pracoŭnych sprečkach».
Dva hady tamu Alaksandr Łukašenka daručyŭ stvaryć prafsajuznyja jačejki na ŭsich pradpryjemstvach, u tym liku pryvatnych. Za admovu jon prapanoŭvaŭ likvidavać pryvatnyja kampanii. U toj ža čas niezaležnyja prafsajuzy ŭ Biełarusi likvidujucca, niekatoryja ź ich lidaraŭ źniavolenyja i pryznanyja palitviaźniami.