U niebie nad Biełharadam i Maskvoj zjavilisia śvietłavyja słupy. Padumali pra novuju zbroju, ale ŭsio bolš banalna
Viečaram 4 kastryčnika ŭ sacyjalnych sietkach raspaŭsiudzilisia fatahrafii z Biełharada, na jakich byli bačnyja słupy žoŭtaha śviatła, jakija ŭzdymajucca ŭ nieba. U suviazi z tym, što Biełharad znachodzicca pablizu miažy z Ukrainaj, u sacsietkach pačali zjaŭlacca zdahadki, što heta moža być niejak źviazana z vajnoj. U tym, čym heta moža tłumačycca, raźbirałasia «Mieduza».
05.10.2022 / 17:54
Fota: t.me/astrapress
U apošnija miesiacy nad Biełharadam nieadnarazova naziralisia śviatło i ŭspyški — u asnoŭnym, jany byli źviazanyja z pracaj SPA. Tamu aŭtary niekatorych viersij śćviardžali, što rasijskija vajskoŭcy mahli prymianić niejkuju najnoŭšuju zbroju.
Fota: t.me/astrapress
«Siońnia była ŭpieršyniu prymienienaja najnoŭšaja zbroja RF. Pa abstavinach naŭrad ci my daviedajemsia, ale śviačeńnie ŭ niebie siońnia bačyli mnohija,» — zajaviŭ «vajenkar» Andrej Rudenka. Jon raźmiaściŭ u svaim telehram-kanale spasyłku na natatku RIA «Naviny» pad nazvaj «Rasija pravodzić ekśpierymienty z zamiežnymi spadarožnikami, paviedamiła Minabarony».
U ananimnych telehram-kanałach taksama zjavilisia mierkavańni, što toje, što zdaryłasia, nibyta mahło być vynikam pracy łaziernaha kompleksu «Pieraśviet». Hetaja łaziernaja zbroja była anansavanaja prezidentam Uładzimiram Pucinym u sakaviku 2018 hoda. Jak śćviardžali ŭ Minabarony, u tym ža hodzie «Pieraśviety» zastupili na dośledna-bajavoje dziažurstva.
Nijakaj infarmacyi ab charaktarystykach «Pieraśvietu» da hetaha času nie raskryvałasia; nibyta hetyja kompleksy zdolnyja aślaplać spadarožnikavyja sistemy raźviedki praciŭnika, adnak pra ich realnaje prymianieńnie abo paśpiachovyja vyprabavańni ničoha nie paviedamlałasia.
Fota: t.me/astrapress
Prykładna ŭ toj ža čas 4 kastryčnika paviedamleńni ab anałahičnym śviačeńni stali zjaŭlacca i ŭ inšych haradach — u pryvatnaści, u Maskvie. Jak heta ŭzhadniałasia z viersijaj ab prymianieńni zbroi, aŭtary adpaviednych teoryj nie tłumačyli.
U toj ža čas u centry nadvorja «Fobas» patłumačyli, što toje, što adbyłosia — usiaho tolki zvyčajnaja atmasfiernaja zjava, jakaja nazyvajecca hało — druhasnaje śviačeńnie vakoł krynicy śviatła.
Soniečny słup — adna z častych raznavidnaściaŭ hało. Jon utvarajecca z-za prałamleńnia śviatła ŭ ledzianych kryštalach, uzvažanych u pavietry, i moža naziracca ŭ zimovaje vilhotnaje zacišnaje nadvorje, kali Sonca znachodzicca pad peŭnym vuhłom da haryzontu albo kali na ziamli jość jarkaja krynica śviatła.
«U nas niadaŭna byli daždžy, atmasfiera vilhotnaja, tamu, mahčyma, u hety momant u atmasfiery byli čaścinki peŭnaha pamieru, jany mahli kryštalizavacca ŭ takoj formie. Kali śviatło prachodzić praz hetyja čaścinki, to ŭtvarajecca takaja zjava. Mahutnaj krynicaj śviatła ŭ hetym vypadku byli ciaplicy», — zajavili RIA «Naviny» ŭ Biełharadskim univiersitecie.
Fota: t.me/astrapress
Miarkujučy pa paviedamleńniach SMI, heta nie pieršy vypadak zjaŭleńnia śvietłavych słupoŭ u Biełharadzie. Anałahičnyja fota publikavali ŭ lutym 2020 hoda.
Śvietłavyja słupy ŭ rozny čas nazirali i ŭ inšych rehijonach Rasii — naprykład, u Sankt-Pieciarburhu ŭ śniežni 2021 hoda, u Murmanskaj vobłaści ŭ sakaviku 2019-ha i ŭ Maskvie ŭ studzieni 2015-ha.