Маланкавая рэакцыя: з-за візіту Лукашэнкі ў Абхазію ў МЗС Грузіі выклікалі беларускага пасла
Анатолю Лісу выказалі пратэст і запатрабавалі тлумачэнняў з нагоды паездкі Аляксандра Лукашэнкі ў рэгіён, які Грузія лічыць акупаваным.
28.09.2022 / 17:22
Сёння на абхазскіх інфармацыйных рэсурсах з'явілася інфармацыя пра візіт у рэгіён Аляксандра Лукашэнкі. Ён сустрэўся з кіраўніком Абхазіі Асланам Бжаніяй, выказаўшыся за развіццё стасункаў з Абхазіяй пры падтрымцы Расіі.
Грузія дэ факта не кантралюе тэрыторыю Абхазіі амаль 30 гадоў, з 1993 года. Але паводле міжнароднага права, гэта бясспрэчна яе дзяржаўная тэрыторыя. У 2008 годзе Расія афіцыйна прызнала незалежнасць Абхазіі (разам з Паўднёвай Асеціяй), але за яе прыкладам дагэтуль пайшлі толькі некалькі краін, прытым, як правіла, вельмі геаграфічна аддаленых і малаўплывовых у свеце і рэгіёне.