Rasijanka stvaryła šryft Belarus, ale biełaruskaha ŭ im niašmat
Kaciaryna Šulak — vypusknica Škoły dyzajnu ŭ Sankt-Pieciarburhu. Niadaŭna na płatformie Behance jana apublikavała novy šryft z nazvaj Belarus. Čamu takaja nazva i jak jana źviazana z našaj krainaj, raźbiraŭsia CityDog.
19.09.2022 / 22:57
Na stvareńnie šryfta dziaŭčynu natchnili pracy cavieckaha mastaka i hrafika Sałamona Telinhatera. U vajenny čas jon stvaraŭ ahitacyjnyja płakaty z antyfašysckimi łozunhami, pracavaŭ mastakom u haziecie «Za Radzimu». Na pieršaj pałasie hetaj haziety čaściej za ŭsio źmiaščali jarkija zakliki i łozunhi, i ŭ ich byli admietnyja šryfty. Ciapier ich nazyvajuć istužačnymi, abo stressed sans.
Za asnovu svajho šryfta Kaciaryna ŭziała płakat Telinhatera sa słovam «Biełorus», adsiul i nazva prajekta.
Płakat dziaŭčyna abrała absalutna vypadkova. Kaža, što hladzieła asabliva na pabudovu litar. Kaciarynie ŭvohule padabajecca dyzajn 40-ch hadoŭ, bo padobnyja šryfty i płakaty paznavalnyja navat dla ciapierašniaha pakaleńnia, ličyć dziaŭčyna.
Historyja samoha płakata «Biełorus» nieviadomaja. Ad jaho zachavałasia tolki malavanaja zastaŭka z vyjavaj sałdata i maci, jakaja adpraŭlaje svajho syna vajavać.
Jak raspaviadaje Kaciaryna, stvorany joju šryft Belarus — heta sučasnaja madyfikacyja «Antykvy» (śpiecyjalny šryft z zasiečkami). U adroźnieńnie ad kłasičnaj viersii, tut niama zasiečak, ale jość kantrast pamiž viertykalnymi i haryzantalnymi ryskami.
Uvieś kłas litar padbiraŭsia ŭručnuju. Dziaŭčyna vykarystała śpiecyjalny sposab-majstarynh: pramaloŭvać kožnuju litaru pa čarzie, vykarystoŭvajučy nakidy
Pa słovach Kaciaryny, u słovie «biełarus» chitraja pabudova litar. Z-za hetaha pryjšłosia dastatkova doŭha dumać nad apisańniem usiaho astatniaha ałfavitu.
Šryft pradstaŭleny na łacincy i kirylicy. Jon znachodzicca ŭ volnym dostupie, i vykarystoŭvać jaho možna dla luboj dziejnaści. Hałoŭnaje — paznačyć aŭtarstva Kaciaryny. Fajły sa šryftami možna znajści ŭ prezientacyi na staroncy Behance.
Kaciaryna raspaviadaje, što, niahledziačy na nazvu šryfta, dadavać varyjant na biełaruskaj movie pakul nie płanuje. Adnak kaža: kali budzie popyt, to abaviazkova zrobić.