Kreml admoviŭsia mianiać vajennapałonnych na amijak
Učora prajšła infarmacyja, što AAN sprabuje pierakanać Ukrainu i Rasiju adnavić pastaŭki rasijskaha amijaku va Ukrainu praz amijakapravod z rasijskaha Taljaci ŭ Adesu, kab pamienšyć hłabalny niedachop uhnajeńniaŭ na suśvietnym rynku. Siońnia pra hetuju ideju vykazalisia prezident Ukrainy Uładzimir Zialenski i aficyjny pradstaŭnik Kramla.
16.09.2022 / 22:34
Pradstaŭnik AAN Rebieka Hrynspan, kamientujučy ideju pra pierazapusk amijakapravodu, kazała: «Pieramovy ruchajucca ŭ pravilnym kirunku, i ŭsie baki na kožnym uzroŭni prykładajuć usie namahańni dla zabieśpiačeńnia stanoŭčaha vyniku», — zajaviła Hrynspan. Pavodle jaje słoŭ, heta robicca «terminova» dla praduchileńnia «charčovaha kryzisu va ŭsim śviecie» ŭ nastupnyja hady, bo amijak — asnoŭny składnik u vytvorčaści nitratnych uhnajeńniaŭ.
Zialenski, adnak, zajaviŭ, što padtrymaje ideju adnaŭleńnia ekspartu rasijskaha amijaku praz Ukrainu tolki ŭ tym vypadku, kali Maskva viernie ŭkrainskich vajennapałonnych. Hetaja zajava prahučała ŭ intervju Reuters.
«Ja suprać pastavak amijaku z Rasijskaj Fiederacyi praz našu terytoryju. Ja b zrabiŭ heta tolki ŭ abmien na našych pałonnych. Mienavita heta ja prapanavaŭ AAN», — skazaŭ ukrainski prezident.
U Kramli hetuju prapanovu Uładzimira Zialenskaha, adnak, prahnazavana adchilili.
«Chiba ludzi i amijak — heta adno i toje ž?», — zajaviŭ pres-sakratar Pucina Dźmitryj Piaskoŭ u intervju TASS.