Jeŭradeputaty patrabujuć ŭvieści vizavuju zabaronu dla biełaruskich i rasijskich vajskoŭcaŭ i čynoŭnikaŭ
Deputaty Jeŭraparłamienta prapanavali viarchoŭnamu pradstaŭniku JeS pa zamiežnych spravach i palitycy biaśpieki Žazepu Barelu i ministru zamiežnych spraŭ Čechii, jakaja staršynstvuje ŭ JeS, Janu Lipaŭskamu ŭvieści zabaronu na vydaču ŭjaznych viz vajskoŭcam z Rasii i Biełarusi, a taksama čynoŭnikam uradaŭ i členaŭ ich siemjaŭ, paviedamlaje Postimees.
14.09.2022 / 09:27
Pra inicyjatyvu raspavioŭ jeŭradeputat ad Estonii Urmas Paet, adznačyŭšy, što jon dałučyŭsia da hetaj prapanovy. Jon ličyć, što dla rasijskich turystaŭ «varta ŭvieści va ŭsim Jeŭrapiejskim sajuzie zabaronu na vydaču turystyčnych viz». Adnak, pakolki krainy-ŭdzielnicy JeS da hetaha času nie zdoleli damovicca pamiž saboj, varta było b praciahnuć pracu ŭ hetym kirunku.
Na dumku členaŭ Jeŭraparłamienta, zabarona na vydaču ŭjaznych viz pavinna zakranuć usich vajskoŭcaŭ i čynoŭnikaŭ uradaŭ Rasii i Biełarusi, a taksama členaŭ ich siemjaŭ.
Raniej paviedamlałasia, što Łatvija, Litva, Estonija, Polšča, Čechija, Słavakija, Danija, Bielhija i Niderłandy pierastali prymać ad rasijan dakumienty na afarmleńnie turystyčnych viz.