Adhadajcie, pa jakich artykułach pryciahvałasia da adkaznaści žančyna, jakaja stała abliččam apałčencaŭ Klimavickaha rajona
Natałla Jermakovič, čyjo fota z aŭtamatam raźmiaściła klimavickaja rajonka dla ilustracyi «narodnaha apałčeńnia» Łobžanskaha sielvykankama, akazvajecca, ciorty žyćciom kadr — na žančynu nieadnarazova składalisia administracyjnyja pratakoły. Ale nie za palityku — Łukašenku jana padtrymlivaje i rychtujecca abaraniacca. Voś tolki zbrojaj joj, ź jaie bijahrafijaj, vałodać nie naležyć.
12.09.2022 / 21:28
Jak stała viadoma «Našaj Nivie», na Natałlu Jermakovič składalisia pratakoły za vyrab brahi, vyrab samahonki, vyroščvańnie maku, a taksama za namieranaje naniasieńnie cialesnych paškodžańniaŭ mužčynu (biła kułakom padčas svarki).
Surazmoŭcy «Našaj Nivy» z orhanaŭ milicyi źviartajuć uvahu, što vydača zbroi asobie z takim pasłužnym śpisam, miakka kažučy, nie etyčna i supiarečyć Zakonu ab zbroi, jaki zabaraniaje nabyvać zbroju samaabarony, spartyŭnuju, palaŭničuju i sihnalnuju asobam, jakija mieli administratyŭnyja spahnańni za namieranaje naniasieńnie cialesnaj škody, drobnaje chulihanstva i h.d.
Mahčyma, u Klimavickim rajonie prosta niebahaty vybar, z kaho farmiravać apałčeńnie.
Sama Natałla zajaviła ŭ kamientaryi «Našaj Nivie», što zbroja była niesapraŭdnaj: «Heta byli mulažy, aŭtamaty niesapraŭdnyja. A ŭ apałčeńnie ŭstupiła, tamu što ciapier časy takija — treba rychtavacca da ŭsiaho, rychtavacca abaraniać viosku.
Chto moža napaści ja nie viedaju. Ale ja padtrymlivaju Łukašenku, nie ŭkraincaŭ ža mnie padtrymlivać, nie banderaŭcaŭ», — skazała jana.