«Nie chaču zabić ideju, pradam u dobryja ruki». U Varšavie na prodaž vystavili biełaruskuju kaviarniu
Biełaruskuju kaviarniu «not 1984» u Varšavie vystavili na prodaž na polskim sajcie OLX. Uładalnik choča za ŭstanovu 150 000 złotych (32 130 dalaraŭ), padrabiaznaści daviedałasia vydańnie MOST.
09.09.2022 / 18:33
Biełaruskuju kaviarniu «not 1984» u Varšavie adkryła vosieńniu 2020 hoda biełaruska Hanna Makievič. Jana pierajechała ŭ Polšču ŭ 2016 hodzie. Zaniałasia biznesam, da kaviarni ŭ jaje ŭžo było dva barbieršopy.
U śniežni 2021 hoda Hanna pradała biznes adnamu z biełarusaŭ u Varšavie, jaki paprasiŭ nie nazyvać jahonaje imia. Pry novym uładalniku ŭstanova funkcyjanuje ŭžo kala 10 miesiacaŭ i śpiecyjalizujecca na biełaruskaj kuchni.
Ale ŭ žniŭni biełarus vyrašyŭ vystavić kaviarniu na prodaž. Bo kaža, što stamiŭsia. Kali pačynaŭ, to dumaŭ, što hastrabiznes — sprava lahčejšaja, až akazałasia, što zusim nie. I ciapier zrazumieŭ, što heta zusim nie jahonaje.
Biełarus hatovy pradać kaviarniu za 150 000 złotych (32 130 dalaraŭ). Kaža, što prykładna stolki ž ukłaŭ u abstalavańnie ŭstanovy. Kaviarnia pradajecca ź jurydyčnaj asobaj, źmianiajecca tolki zasnavalnik.
«Viadoma, chaciełasia b pradać biełarusam. Indusy telefanavali i hatovyja kupić, ale jany mohuć zakryć biełaruskuju kropku i pradavać tam kiebaby.
Ja chaču znajści dobraha novaha ŭładalnika, jakomu blizkaja tema Biełarusi. Nie chočacca stracić ideju. Pry prodažy, moža, navat zamacavać dakumientalna, što biełaruski prajekt budzie žyć», — adznačyŭ ciapierašni ŭładalnik ustanovy.