Ajcišnika pasadzili na try hady za fota ŭ «Biełaruski Hajun»
U Homielskim abłasnym sudzie 1 vieraśnia da troch hadoŭ kałonii va ŭmovach uzmocnienaha režymu asudzili 31-hadovaha palitźniavolenaha digital-mastaka Viktara Kulinku. Za pieradaču ŭ telehram-kanał «Biełaruski Hajun» fota kałony vajskovaj techniki rasijskich vojskaŭ, jakaja ruchałasia ŭ bok Homiela paśla pačatku vajny, jaho abvinavacili ŭ sadziejničańni ekstremisckaj dziejnaści pavodle art. 361-4 Kryminalnaha kodeksa. Spravu suprać palitviaźnia razhladała suddzia Iryna Vładyka.
05.09.2022 / 10:44
Viktara zatrymali 30 sakavika i zapisali ź im «pakajannaje videa», dzie jon raspaviadaje, što sfatahrafavaŭ kałonu vajskovaj techniki rasijskich vojskaŭ, jakaja nakiroŭvałasia ŭ bok Homiela. Pa jaho słovach, fota jon pieradaŭ u telehram-kanał «Biełaruski Hajun». 16 sakavika hety kanał byŭ pryznany ekstremisckim farmavańniem. Taksama paviedamlałasia, što siłaviki znajšli ŭ jaho telefonie rehistracyju ŭ «Płanie Pieramoha», paviedamlaje «Viasna».
U vyniku Viktaru vystavili abvinavačvańnie pa dvuch častkach artykuła 361-4 Kryminalnaha kodeksa — inšaje sadziejničańnie ekstremisckaj dziejnaści i tyja ž dziejańni, učynienyja hrupaj asobaŭ pa papiaredniaj zmovie.
Spravu suprać Kulinki pačali razhladać 29 žniŭnia, a 1 vieraśnia byŭ vyniesieny prysud.