Фігуранта «справы Аўтуховіча» Антона Мельхера перавялі пад хатні арышт
Пра гэта распавяла дачка Мікалая Аўтуховіча ў сябе ў інстаграме.
02.09.2022 / 12:38
Па яе словах, тэрмін яго ўтрымання пад вартай скончыўся. Цяпер Мельхер «ў інтэрнаце без дзвярэй, насупраць жывуць амапаўцы».
У лютым 2021 КДБ унёс Мельхера ў «спіс тэрарыстаў».
У снежні 2021 года сюжэт «Беларусі 1» распавядаў, што 27-гадовы Антон Мельхер «аказваў тую ці іншую дапамогу Аўтуховічу». Мяркуючы па старонцы Мельхера ва ўкантакце, у 2015 годзе ён скончыў эканамічны факультэт Брэсцкага дзяржаўнага тэхнічнага ўніверсітэта.
Абвінавачанымі па справе праходзяць 12 чалавек. Галоўны фігурант — прадпрымальнік з Ваўкавыска Мікалай Аўтуховіч. КДБ сцвярджае, што Аўтуховіч назапасіўся зброі і выбухоўкі ва Украіне, уладкаваў некалькі схронаў і пашкодзіў машыны двух міліцыянтаў. Суд па справе ў Гродне ідзе з другой паловы мая.