Зяленскі: Адносна ўкраінскага грамадзянства для замежных добраахвотнікаў ужо ініцыяваныя заканадаўчыя змены
Пытанне пра ўкранскае грамадзянства для замежнікаў, якія ваююць за Украіну, вырашаецца: ужо ініцыяваныя заканадаўчыя змены. Так прэзідэнт Украіны Уладзімір Зяленскі адказаў на петыцыю, апублікаваную на пачатку чэрвеня.
26.08.2022 / 21:43
У сваім адказе Зяленскі таксама адзначае, што ўжо неаднаразова выдаваў указы пра наданне грамадзянства Украіны замежным добраахвотнікам.
У петыцыі прапаноўвалася надаваць украінскае грамадзянства замежным добраахвотнікам, у тым ліку беларусам, паводле паскоранай працэдуры. Аўтары звароту нагадвалі, што беларусы, якія трапляюць у палон, не абароненыя міжнароднымі канвенцыямі як ваеннапалонныя, іх абмен немагчымы, а на радзіме ім пагражае крымінальная адказнасць — аж да смяротнага пакарання.
Менш чым за тры месяцы пад петыцыяй падпісаліся больш за 28 тысяч чалавек. Для разгляду і абавязкова адказу прэзідэнта неабходна, каб такіх подпісаў назбіралася 25 тысяч.