Камунальная драма: у Кобрыне суседзі перакапалі участак, шукаючы памыйную яму, якой няма ВІДЭА
Пенсіянерка з Кобрына і ейны сын абвінавачваюць ва ўсіх побытавых бедах сваіх суседзяў, якія нібыта зрабілі побач з іх участкам туалет і памыйную яму.
20.08.2022 / 14:28
У суседскім канфлікце спрабавала разабрацца ТРК «Брэст».
Пенсіянерка Марыя Дзям'янаўна знайшла расколіны пад вокнамі свайго дома. Акрамя гэтага, у склепе, па словах жанчыны, пачала з'яўляцца чорная цвіль, якой раней не было.
У гэтым яна вінаваціць суседзяў, якія нібыта ўладкавалі побач туалет і памыйную яму. А калі яны ўключаюць пральную машыну, то ў пенсіянеркі яшчэ і раса ўнутры акна з'яўляецца.
Суседзі прэтэнзіі адмаўляюць і кажуць, што жанчына проста шукае нагоды для сваркі і тэрарызуе ўвесь раён.
Сына суседкі Марыя Дзям'янаўна абвінаваціла ў тым, што ён у дзве гадзіны ночы сядзеў у туалеце і пасля выцягваў нейкія трубы. Яна, маўляў, паўгадзіны стаяла і ўсё бачыла.
У канцы сюжэта суседзі перакапалі меркаванае месца, дзе нібыта знаходзіцца памыйная яма, але нічога не знайшлі.
Прадстаўнікі «Водаканала» пацвердзілі, што ніякай каналізацыі няма і прэтэнзій да жыхароў няма.
Намеснік начальніка аддзела архітэктуры раёна, якога таксама ўцягнулі ў разборкі, сказаў, што з прычынамі расколін трэба разбірацца. Для гэтага пенсіянерцы трэба замаўляць экспертызу.