Кандыдатаў у начальнікі хочуць правяраць праз сістэму распазнавання асоб
Газета «Веснік Магілёва», орган Магілёўскага гарвыканкама, піша, што праграмны прадукт Facial recognition technology (FRT) нібыта цяпер знаходзіцца ў стадыі абкаткі і амаль гатовы для выкарыстання.
16.08.2022 / 17:45
Сэнс новай вынаходкі такі, што пры праходжанні асаблівай праверкі на пасаду ў любой дзяржустанове або павышэнні, кандыдат перад паліграфам (у выпадку, калі ён прымяняецца) будзе правярацца па базе, асноўная задача якой — выявіць факт прысутнасці чалавека на пратэсных мерапрыемствах.
Выказваецца спадзяванне, што такія праверкі мінімізуюць шанцы для трапляння ў шэрагі дзяржслужачых «нядобранадзейных» кандыдатаў.
Пакуль не названы распрацоўшчык прадукту, аднак кансультаванне, піша выданне, ажыццяўляе шэраг расійскіх распрацоўшчыкаў падобных прадуктаў, сярод якіх і тыя, хто падтрымліваюць працу софту ад NtechLab.
Раней у масавым апазнаванні пратэстоўцаў абвінавачвалі сістэму, распрацаваную кампаніяй «Сінезіс», але цяперашняя інфармацыя аб прыцягненні да распрацоўкі расійскіх кампаній, падобна, не пацвярджае гэтага.