У Горацкім раёне п’яны падлетак угнаў трактар і патрапіў у ДТЗ
У Горацкім раёне п’яны падлетак сагнаў трактар і патрапіў на ім у ДТЗ, паведамілі ва УУС Магілёўскага аблвыканкама.
02.08.2022 / 21:50
Фота: УУС Магілёўскага аблвыканкама
Учора ў міліцыю Горацкага раёна звярнуўся ўладальнік прыватнай дваровай гаспадаркі з заявай аб спробе ўгону трактара, які быў знойдзены непадалёку з перакуленым прычэпам.
Праваахоўнікі ўстанавілі, што да ўгону датычны 17-гадовы жыхар Горацкага раёна. Будучы ў нецвярозым стане, малады чалавек убачыў трактар з пакінутым у замку ключом запальвання. «Падлетак вырашыў скарыстацца з выпадку і з’ездзіць у суседні населены пункт да свайго сябра. Але далёка з’ехаць ён не змог: не справіўся з кіраваннем, з-за чаго перакуліўся прычэп», — адзначылі ва УУС.
Пасля аварыі хлопец спалохаўся і кінуў трактар, а сам уцёк з месца здарэння.
Трактар і прычэп вернутыя ўладальніку, а па факце ўгону ўзбуджаная крымінальная справа.