У Брытаніі сарвалі рэкордны джэкпот у еўрапейскай латарэі
Уладальнік латарэйнага білета з Вялікабрытаніі сарваў рэкордны джэкпот агульнаеўрапейскай латарэі EuroMillions у памеры 195,7 мільёна фунтаў стэрлінгаў (230 мільёнаў еўра). Пра гэта паведамляе BBC.
20.07.2022 / 20:39
Брытанскі латарэйны аператар Camelot пацвердзіў, што гаворка ідзе таксама пра найбуйнейшы латарэйны выйгрыш за ўсю гісторыю Вялікабрытаніі.
Цяпер уладальнік пераможнага білета павінен звязацца з аператарам і пацвердзіць свой выйгрыш. Калі ён гэтага не зробіць, сума пераходзіць да наступнага джэкпота.
Розыгрыш EuroMillions адбываецца кожны аўторак і пятніцу ў дзевяці краінах Еўропы. Для выйгрышу джэкпота ўладальніку білета трэба адгадаць сем лічбаў: пяць звычайных і дзве бонусныя (Lucky Star).
Летась джэкпот у 210 мільёнаў еўра ў латарэю EuroMillions сарваў жыхар Швейцарыі.