«Jon nie viedaŭ, što mnie padabajucca dziaŭčaty». Biseksuałka raskazała pra svoj dośvied
Jašče padletkam Alaksandra čas ad času prajaŭlała ŭvahu da svajoj adnakłaśnicy. Ale tady dumak pra toje, što jana moža sustrakacca i z chłopcami, i z dziaŭčatami, u jaje nie było. Pra heta jana daviedałasia čatyry hady tamu, kali siabroŭka prapanavała joj sustrakacca. Dziaŭčyna raskazała «Našaj Nivie», jak jana pahavaryła pra heta z maci i čamu intym z dziaŭčatami joj bolš padabajecca.
23.07.2022 / 20:19
Fota: pixabay.com / Olexy Ohurtsov
«Maci adkazała, što jana tak i dumała, pažadała nam ščaścia»
Alaksandra (imia źmieniena) daviedałasia, što joj padabajucca i chłopcy, i dziaŭčaty, u 2018-m. Tady jana paznajomiłasia z budučaj partniorkaj, jakaja dała joj zrazumieć, što choča ad ich adnosin nie tolki siabroŭstva.
«Ja pačała analizavać minułaje i zrazumieła, što takoje ŭ mianie ŭžo było ŭ škole, — raskazvaje jana. — Jašče pieršapačatkova ŭ padletkavym uzroście byli dumki pra mahčymaje kachańnie z dziaŭčynaj, ale ničoha bolš.
Mahła abdymacca z adnakłaśnicaj, mnie padabałasia. Kali mnie było 10 hadoŭ, z siabroŭkaj byli niejkija vielmi ciopłyja adnosiny. Heta ja zaraz analizuju i razumieju, što jany byli nie tolki siabroŭskimi.
Spačatku ŭ mianie byŭ šok. Ja sama sabie da hetaha kazała, što nikoli nie budu sustrakacca z dziaŭčatami. Vielmi kateharyčna i rezka da hetaha staviłasia.
Nie skažu, što ja pačała siabie nienavidzieć, ale ŭ mianie była hamafobija. Kab pryniać siabie, spatrebiłasia niekalki hadoŭ: šmat razmaŭlała sa svajoj dziaŭčynaj na hety kont, čytała padobnyja historyi. Da śpiecyjalista nie źviartałasia, raźbirałasia sama z saboj».
U 2018-m Alaksandra rasstałasia sa svajoj partniorkaj i pačała sustrakacca z chłopcam. Jon byŭ małodšy za jaje na čatyry hady.
«Tady mnie było 19, ciapier — 23. Spačatku ŭsio było dobra, a potym pačalisia prablemy. Jak by stereatypna ni hučała, ale ŭsio ž kali partnior małodšy za ciabie, heta składana.
Fota: pixabay.com / Pexels
Z časam ja stała ŭspaminać ab svajoj byłoj dziaŭčynie, sumavać. Sprabavała adhaniać ad siabie hetyja dumki, ale biezvynikova. Potym my ź joj niekalki razoŭ śpisvalisia, ale narmalnaj kamunikacyi nie atrymlivałasia, tamu što rasstalisia dastatkova ciažka. Z chłopcam usio było narmalna da studzienia 2019 hoda. Ale potym ja zahnałasia pa hetaj dziaŭčynie i dumała tolki ab joj. U vyniku našy adnosiny z chłopcam praciahnulisia paŭhoda i potym my razyšlisia.
Viadoma, ja jamu ničoha nie kazała pra toje, što mnie padabajucca dziaŭčaty, tamu što nie viedała, jak jon usio ŭsprymie. Raspaviadała tolki svaim blizkim siabram», — kaža jana.
Hetaje rasstańnie Alaksandra pieražyła dosyć prosta. Užo praz tydzień jana pačała novyja adnosiny — z dziaŭčynaj.
Ź joj u Alaksandry ŭ žyćci źjaviłasia raznastajnaść. Da hetaha z byłoj dziaŭčynaj u jaje byŭ prosta seks, u novych adnosinach źjavilisia pacałunki.
«Hetyja adnosiny praciahnulisia dva miesiacy. Mnie patrebnaja była ŭvaha, a jaje nie było. Čałaviek byŭ zacikaŭleny bolš na sabie. Paśla jaje znoŭ byli adnosiny z dziaŭčynaj. Sustrakalisia ź joj kala hoda, taksama razychodzilisia i sychodzilisia. U cełym u mianie paśla kožnaha razryvu novyja adnosiny pačynalisia praz niekalki tydniaŭ. I dumaju, što lepš tak nie rabić, patrebny pierapynak.
Padčas adnosin z novaj dziaŭčynaj ja pačała sustrakacca z byłoj, zdradžvała. Ale heta ja tłumačyła sabie tym, što mnie nie dajuć taho, što ja chaču, — dobraha seksu.
Dumaju, što jana zdahadvałasia pra heta, ale ja joj asabista ničoha adkryta nie kazała. Uletku 2020-ha my ŭsio ž rasstalisia. I paśla ja navat zakachałasia ŭ chłopca. Da mianie dadomu pryjšoŭ siabar znajomaj, pahladzieła na jaho, a jon jak z karcinki. Pačali razmaŭlać, sustrakacca, ale praz miesiac ja zrazumieła, što mnie ź im sumna.
Pamiataju situacyju, kali my hulali i prosta hadziny try maŭčali, tamu što nie było, pra što pahavaryć. Na niadoŭhi pieryjad my znoŭ syšlisia z papiaredniaj byłoj, na paru miesiacaŭ, musić», — dzielicca jana.
«Ciapier bajusia, što pra heta daviedajecca babula»
Jak kaža Alaksandra, paśla ŭ jaje pačałasia «narmalnaje žyćcio». Jana paznajomiłasia z dziaŭčynaj, ź jakoj jany razam užo dva hady. Heta samyja praciahłyja adnosiny Alaksandry.
«My z siabrami pajechali ŭ padarožža ŭ Hrodna. Siarod ich była dziaŭčyna, nie maja znajomaja. Ja ŭ jaje zakachałasia. Darečy, jana da mianie sustrakałasia tolki z adnym chłopcam, usie astatnija partniory byli dziaŭčatami», — kaža jana.
Nikomu z chłopcaŭ, ź jakimi ŭ Alaksandry byli adnosiny, jana nie raskazvała, što biseksuałka.
«Prynamsi, nikoli sama razmovu pra heta nie zavodziła, — raskazvaje jana. — Chłopiec, jaki maładziejšy za mianie byŭ, daviedaŭsia pra heta. I toje jon nie ŭ kursie, što ja mieła pačućci da dziaŭčat padčas adnosin ź im.
Kali ja razumieju, što z hetym čałaviekam usio surjozna i nadoŭha, to ja adrazu ŭsio raskazvaju. Pieršyja miesiacy ŭ majoj dziaŭčyny, musić, byli pieražyvańni, što my taksama možam chutka rasstacca, ale potym takaja tryvožnaść syšła. Ja nastajała na tym, što ŭsio surjozna.
U cełym, kali pačalisia pieršyja adnosiny z dziaŭčynaj, u mianie ŭnutry jak byccam hareŭ ahoń. Heta niešta novaje ŭ maim žyćci. I toje, što mnie padabajecca. A jašče bolš nadavała ahniu toje, što ŭ našym hramadstvie heta nieprymalna. Soramna i strašna było, što baćki pra mianie padumajuć».
Fota: pixabay.com / miapowterr
Pieršaj pra adnosiny dački z dziaŭčynaj daviedałasia maci partniorki Alaksandry.
«U jaje jana pytałasia, ci kachańnie ŭ nas. Praz hod prykładna jana ŭsio ž sama zdahadałasia, što my razam. Zrazumieli, što ciahnuć niama kudy, treba pryznavacca. Jaje maci stała tady pisać, što jana jaje nie tak vychavała, što heta drenna. I ja vyrašyła, što lepš u hety dzień raskazać i majoj mamie pra heta. Ja napisała joj vialikaje paviedamleńnie, pa telefonie mnie było b ciažka heta skazać.
Adpraviła paviedamleńnie, jana jaho ŭbačyła tolki praz dzień. Adkazała, što jana tak i dumała, pažadała nam ščaścia. Ale i skazała, što žadaje ŭnukaŭ. Ničoha takoha strohaha ź jaie boku nie było. Chacia zaraz mnie zdajecca, što jana ŭ hłybini dušy baicca, pieražyvaje, złujecca.
Maje siabry narmalna adreahavali, kali ja im raskazała, što sustrakajusia z dziaŭčynaj. Była jašče takaja śmiešnaja situacyja. Raskładvali karty taro. Mnie vypała žanočaja karta. Ja stała žartavać, što takoha nie moža być. Raskazała siabram pra maje adnosiny z dziaŭčynaj tolki praz hod. I tady jany mnie nahadali pra hetuju situacyju», — kaža jana.
Zavodzić dziaciej Alaksandra i jaje dziaŭčyna bližejšym časam nie płanujuć.
«Adzinaje dzicia zaraz u našaj siamji — sabaka. Na vychavańnie treba niervy, umieńnie heta rabić, kab vyras dobry čałaviek. Mama na mianie ŭ hetym płanie nie ciśnie, bo ja pieršapačatkova pastaviła siabie tak, što budzie tak, jak ja vyrašyła.
U cełym ja adčuvaju vializnuju roźnicu pamiž chłopcami i dziaŭčatami ŭ adnosinach. Z dziaŭčatami mnie lahčej znachodzić ahulnuju movu, sami znosiny prachodzić lahčej, mianie razumiejuć», — tłumačyć surazmoŭca.
Seks Alaksandry padabajecca mienavita z dziaŭčatami. Jana ličyć, što heta pracuje na emacyjanalnym uzroŭni.
«Flirt prachodzić cikaviej. Mahčyma, mnie nie sustrakalisia chłopcy, ź jakimi b mnie taksama tak było kamfortna.
Sam praces — heta ŭzajemnyja łaski, my vykarystoŭvajem tolki ruki, a taksama kunilinhus. Z cackami jašče nie sprabavali, chacia ja pra heta dumaju. Zrazumieła, što ŭ paraŭnańni z seksam z chłopcam raznastajnaści niama, ale mnie i hetaha chapaje. Z dziaŭčatami ja adčuvaju bolš ŭzbudžeńnia, zapał. Voś navat kali ja zakachałasia ŭ chłopca, usio było narmalna, ale sam seks mnie nie padabaŭsia», — kaža jana.
Na viečaryny dla biseksuałaŭ Alaksandra nikoli nie chadziła. Jana znajomiłasia z chłopcami i dziaŭčatami ŭžyvuju i praz Cindar.
«Ja viedaju, što dla biseksuałaŭ u Minsku jość kłub «Burlesk». U Cindary ja znajšła tolki adny adnosiny. Usie astatnija razy — užyvuju znajomilisia. Znachodzić ludziej praz Cindar mnie niejak nie asabliva padabajecca. Raniej, u padletkavym uzroście, mahła spakojna napisać nieznajomamu čałavieku «Ukantakcie», kab paznajomicca. Ale tak u mianie było z chłopcami», — dzielicca jana.
Samym składanym u pryniaćci siabie dla Alaksandry było toje, što jaje mohuć nie zrazumieć navakolnyja, blizkija ludzi. I jana zastaniecca adna.
«I pra mamu. Jana zaraz usio viedaje. Jak akazałasia, heta było nie strašna. Ciapier bajusia, što pra heta daviedajecca babula», — padsumoŭvaje dziaŭčyna.