U tvitary źjaviłasia supołka šytpościeraŭ, jakija trolać rasijskich prapahandystaŭ. Ich hałoŭnaja zbroja — miemy ź siba-inu
U anhłamoŭnym siehmiencie tvitara siarod vajskoŭcaŭ źjaviłasia supolnaść šytpościeraŭ, jakija vyśmiejvajuć i vykryvajuć dezynfarmacyju Rasii pra vajnu va Ukrainie, trolać rasijskich dypłamataŭ i prapahandystaŭ i źbirajuć achviaravańni na dapamohu ŭkraincam. Supolnaść, piša «Mieduza», nazyvaje siabie The Fellas («Čuvaki») abo NAFA (North Atlantic Fellas Organization) — Arhanizacyja paŭnočnaatłantyčnych čuvakoŭ — pa anałohii z NATA.
14.07.2022 / 20:04
Udzielnikaŭ abo karystalnikaŭ, jakija spačuvajuć NAFA, lohka paznać pa avatarkach i miemach z čuvakami (The Fellas) — antrapamorfnymi sabakami siba-inu. Čaściakom piersanažy apranutyja ŭ vajskovuju formu. Siarod tych, chto tak ci inakš padtrymlivaje NAFA — Džek Makiejn, syn sienatara ZŠA Džona Makiejna, vajskovy analityk CNN Mark Chartlinh i hienierał-major armii ZŠA Patryk Donachju.
Čuvakoŭ prydumaŭ mastak Kama (@Kama_Kamilia), jaki na pačatku maja pačaŭ ustaŭlać piersanažaŭ na vypadkovyja vyjavy z Ukrainy. Prykładna ŭ toj ža čas dobraachvotniki z «Hruzinskaha lehijona», jakija vajuiuć na baku USU, pačali źbirać achviaravańni na ŭzbrajeńnie dla Ukrainy. Kama vyrašyŭ dapamahčy zboru i staŭ malavać avatarki z čuvakami dla achviaradaŭcaŭ.
Jak ličycca, adzin ź pieršych kałažaŭ NAFA
Avatarka z čuvakom dla adnaho z achviaradaŭcaŭ
Usieahulnuju ŭvahu ruch NAFA pryciahnuŭ da siabie na fonie publičnaj sprečki z pastajannym pradstaŭnikom RF pry mižnarodnych arhanizacyjach u Vienie Michaiłam Uljanavym.
19 červienia rasijski dypłamat napisaŭ u tvitary: «Samy papularny zachodni naratyŭ: Rasija raspačała niespravakavanaje ŭvarvańnie va Ukrainu. Niespravakavanaje? Ukrainskaje vojska abstrelvaje mirnaje nasielnictva Danbasa z 2014 hoda i dahetul».
U repłajach da tvita Uljanava adzin z udzielnikaŭ NAFA adznačyŭ niasłušnaść arhumienta dypłamata. «Vy [pa sutnaści kažacie]: «My pavinny bambić usio mirnaje ŭkrainskaje nasielnictva, tamu što padčas unutranaj vajny va Ukrainie niekatoryja mirnyja žychary patrapili pad abstreły». Uljanaŭ adkazaŭ: «Vy skazali hetuju łuchtu. Nie ja».
Paśla hetaha dyjałohu ŭ tvitar dypłamata pryjšli i inšyja ŭdzielniki NAFA, kab patrolić jaho, u tym liku štoraz paŭtarajučy frazu pra łuchtu.
Ciapier šytpościery prychodziać u kožny tred rasijskich čynoŭnikaŭ i prapahandystaŭ.
Adkaz na tred hałoŭnaha redaktara RT Marharyty Simańjan pra vojska DNR: «Takaja łuchta, bam!»
Słovy Uljanava pra łuchtu stali miemam. Dabračynnaja arhanizacyja St. Javelin, jakaja źbiraje hrošy na padtrymku i adnaŭleńnie Ukrainy, pačała pradavać ź im futbołki, a taksama inšy mierč z NAFA.
Mierč z NAFA ad St. Javelin
Usiaho da momantu hutarki mastaka Kama z žurnalistami Motherboard supołka zmahła sabrać kala 47 tysiač dołaraŭ dla «Hruzinskaha lehijona» i 30-50 tysiač dołaraŭ na dapamohu Ukrainie praz prodažy na sajcie St. Javelin.