U Viciebsku aśviacili novy kaścioł
Kaścioł śviatoha Ihnacyja Łajoły pabudavany ŭ viciebskim mikrarajonie Bileva, paviedamlajuć «Narodnyja naviny Viciebska».
10.07.2022 / 10:24
Heta ŭžo čacviorty katalicki chram, jaki zjaviŭsia ŭ horadzie za čas niezaležnaści Biełarusi.
Pieršym, u 2009 hodzie, aśviacili kaścioł Jezusa Miłasernaha, kudy pieranieśli viciebskuju katedru. U 2013-m kansekravali kaścioł Śviatoha Ducha (pierarobleny z niedabudavanaha basiejna), a ŭ 2017-m — kaścioł śviatoha Antonija (pierarobleny z byłoha Doma kultury).
Budynak novaha viciebskaha kaścioła mała nahadvaje kłasičnuju biełaruskuju sakralnuju architekturu — jon całkam składajecca z paralelepipiedaŭ. Freski na ałtarnaj ścianie spałučajuć kłasičny siužet z Tajnaj viačeraj z vyjavami našych sučaśnikaŭ — ad Dyjeha Maradony da žurnalistaŭ. Praŭda, padobnaha stylu freski, vykananyja tym ža mastakom, znachodziacca i ŭ kaściole śviatoha Antonija.