Pušylin: Sudzić pałonnych bajcoŭ «Azova» budzie «trybunał»
Usie ŭkrainskija vajskoŭcy, jakija zdalisia ŭ pałon na zavodzie «Azoŭstal» u Maryupali, ciapier znachodziacca na terytoryi «DNR», dzie ich płanujuć addać pad trybunał, zajaviŭ kiraŭnik samaabvieščanaj respubliki Dzianis Pušylin.
23.05.2022 / 12:04
Fota: AP
«Pałonnyja z «Azoŭstali» ŭtrymlivajucca na terytoryi «DNR». Mižnarodny trybunał płanujecca taksama arhanizavać na terytoryi respubliki. Ciapier prapracoŭvajecca statut trybunała», — skazaŭ jon «Interfaksu».
Mietałurhičny kambinat «Azoŭstal» u Maryupali znachodziŭsia ŭ abłozie z pačatku sakavika. Heta była apošniaja nie zaniataja rasijskimi vajskoŭcami kropka ŭ horadzie, jakaja była pazbaŭlenaja suviazi sa źniešnim śvietam.
Ukraincy trymali abaronu da 16 maja: u hety dzień Hienštab USU zahadaŭ kamandziram padraździaleńniaŭ, jakija znachodziacca na «Azoŭstali», «zachavać žyćcio asabovaha składu».
Pavodle rasijskich SMI, zdalisia 2 439 čałaviek. Kijeŭ zajaŭlaje, što jany buduć abmienienyja na rasijskich pałonnych. Pra takuju mahčymaść zajaviŭ siońnia i namieśnik kiraŭnika MZS Rasii Andrej Rudenka, jaki dapuściŭ mahčymaść abmierkavańnia z Ukrainaj abmienu pałonnych z «Azoŭstali».