Час распранацца. 10 разнастайных сукенак і лёгкіх касцюмаў ад беларускіх дызайнераў
Вясна была не самай цёплай, але нарэшце можна пакрысе скідваць з сябе вопратку і выгульваць вяснова-летнія лукі. Паглядзелі, якія навінкі прапануюць у гэтым сезоне беларускія дызайнеры.
15.05.2022 / 13:24
Брэнд PSHENICA звычайна працуе з ільном, і ў іх вялікі выбар сукенак з гэтага матэрыялу. Але ёсць і рэчы з мусліну, галоўная перавага якога ў тым, што яго можна не прасаваць.
У такой «зефірнай» сукенцы вы будзеце сябе адчуваць, «як у аблачынцы» — пішуць тыя, хто ўжо паспрабаваў яе ў нашэнні.
Кветкавыя прынты — класіка вяснова-летняга сезона, яны пра свабоду і жаноцкасць. Такія варыянты можна знайсці ў брэнда The Young Clothes.
Такую мадэль можна насіць як з поясам, падкрэсліваючы талію, так і без яго.
Кошт: 170 BYN
За рамантычным лукам можна таксама наведацца ў краму 9.22_store. На выбар — сукенкі ў гарох, кветкавыя і барочныя матывы ці вось такая яркая «галівудская» сукенка, як на фота.
Кошт: 190 BYN
У сукенку сапраўднай прынцэсы ці нават нявесты прапануе пераапрануцца дызайнерка Каця Цікота. На ёй — рэч-трансформер: сарафан можна насіць як з накідкай, так і без яе.
Сарафан: 220 BYN, накідка — 250 BYN.
Аматараў свабодных сілуэтаў і стылю кэжуал можа скарыць сукенка-сарафан з бавоўны ад ZNWR. Мадэль Assol — «лёгкая, як летні вецер» — не замінае рухам і прадаецца ў некалькіх колерах: ад чорнай класікі да легкадумнага бэзу.
Кошт: 210 BYN
Адначасова строгую і гуллівую сукенку прапануе дызайнерка Ірына Бойцік: яе можна лёгка апрануць і на працу, і на спатканне. Тым больш тканіна вельмі камфортная: сумесь шоўку з бавоўнай. Але адна з галоўных разынак каралава-аранжавай сукенкі — прыгожы выраз, што адкрывае ключыцы.
Кошт: 515 BYN
Любіце спартыўны стыль? Знойдзеце варыянты ў дызайнеркі, якая заснавала ХОЛОD™. Хаця брэнд стварае таксама вельмі жаноцкія сукенкі з сарафанамі. Але для расслабленага луку рэкамендуем звярнуць увагу на такія вось доўгія майкі з вышыўкай, якія можна насіць як з джынсамі, так і асобна.
Ніколі не страцць сваёй актуальнасці і ўніверсальнасці сукенкі-камбінацыі. Іх класна спалучаць са світшотамі, кардыганамі ці жакетамі ну і, вядома, насіць як самастойныя рэчы. У каманды 10motifs — досыць багатая колеравая палітра: чорныя, малочна-ружовыя, блакітныя, ізумрудныя і срэбраныя.
Класічныя сілуэты «з разынкай», якія і робяць вобраз непаўторным — гэта моцны бок адзення ад MUA. Напрыклад, у такой сукенцы з адкрытай спінай і яркім прынтам вы дакладна не застаняцеся без увагі.
Кошт: 199 BYN
Калі хочацца яркага, вясновага, але сукенкі — не ваша тэма, варта заглянуць па незвычайныя сакавітыя касцюмы да дызайнеркі Вольгі Кардаш. Трэнд сезона — блакітныя і жоўтыя рэчы, у якіх вы дакладна не застаняцеся незаўважанай.
Кошт: 265.97 еўра