Tysiačy ludziej pryjšli raźvitacca sa Stanisłavam Šuškievičam. Siem chvilin doŭžylisia apładyśmienty VIDEA
U minskaj archikatedry na płoščy Svabody dva dni ludzi raźvitvalisia sa Stanisłavam Šuškievičam.
07.05.2022 / 13:31
Siarod prysutnych byli zaŭvažanyja byłyja deputaty Viarchoŭnaha Savieta, navukoŭcy, hramadskija dziejačy.
Uzdoŭž płoščy Svabody ŭ Minsku ŭtvaryłasia čarha z ludziej, jakija chacieli raźvitacca sa Stanisłavam Šuškievičam. Videa publikuje Radyjo Svaboda.
Na raźvitańnie ludzi ŭ sabory zładzili Stanisłavu Šuškieviču praciahłyja apładyśmienty. Jany doŭžylisia kala siami chvilin.
Alaksandr Łukašenka prajaviŭ svaju pomślivaść i nieciarpimaść i tut. Nie tolki aficyjnych pradstaŭnikoŭ uładaŭ, navat vianočka ad ich nie było, choć Stanisłaŭ Šuškievič byŭ pieršym kiraŭnikom niezaležnaj Biełarusi i jaho pachavańnie musiła b być uračystaściu dziaržaŭnaha statusu.
Pachavali Stanisłava Šuškieviča na Paŭnočnych mohiłkach, choć i tut ułady ŭstaŭlali pałki ŭ koły. Heta było jahonaje žadańnie — lažać pobač sa svajoj maci. Trunu z ciełam Stanisłava Šuškieviča nakryli biełaruskim nacyjanalnym ściaham.
Stanisłaŭ Šuškievič pamior 4 maja paśla pieraniesienaha im kavidu. Jamu było 87 hadoŭ. Viadomy fizik-jadzierščyk, člen-karespandent Akademii navuk Biełarusi, prarektar Biełaruskaha dziaržaŭnaha ŭniviersiteta, jon zrabiŭ šmat dla zdabyćcia Biełarussiu niezaležnaści. Ën paśladoŭna padtrymlivaŭ kurs na suvierenitet i ŭ śniežni 1991-ha byŭ tym čałaviekam, jaki patelefanavaŭ prezidentu SSSR Michaiłu Harbačovu, kab paviedamić tamu pra rašeńnie novych niezaležnych dziaržaŭ raspuścić Sajuz.
Stanisłaŭ Šuškievič u 1991—1994 hadach byŭ staršynioj Viarchoŭnaha Savieta, naminalnym kiraŭnikom dziaržavy, choć realnaja ŭłada ŭ toj čas była ŭ rukach prem’ier-ministra.
Šuškieviču davodziłasia łaviravać miž postkamunistyčnaj bolšaściu, jakaja daminavała, i Narodnym frontam, jaki zastavaŭsia ŭ mienšaści, choć i mieŭ značnuju maralnuju vahu, va ŭmovach, kali ŭ Maskvie centr ułady pastupova pierachodziŭ ad idealistaŭ-demakrataŭ časoŭ pierabudovy da nieaimpieryjalistaŭ.
Zdabyćcio i ŭmacavańnie niezaležnaści Biełarusi było dla Šuškieviča hałoŭnaj metaj. U pryncypovych pytańniach jon kiravaŭsia tolki hetaj zadačaj i mieŭ ščaście pabačyć svaju krainu niezaležnaj.
Šuškievič, jaki mieŭ prapanovy pracy z usich kutkoŭ śvietu, zastavaŭsia žyć u Minsku i amal da apošnich hadoŭ pracavaŭ. Pra jaho jak čałavieka i prafiesijanała zastalisia ciopłyja ŭspaminy ŭ jaho byłych studentaŭ, kaleh i prosta ziemlakoŭ.
Da apošnich dzion svajho žyćcia jon zastavaŭsia bieskampramisnym praciŭnikam dyktatury Łukašenki.