MUS pacvierdziła padryŭ milicejskaha aŭto kala RUUSa. Padazravanaha zatrymali
Zdareńnie adbyłosia ŭ noč z 7 na 8 studzienia niedaloka ad budynka Centralnaha RUUS Minska. Pra heta žurnalistam paviedamiŭ namieśnik ministra ŭnutranych spraŭ Hienadź Kazakievič. Milicyja zatrymała padazravanaha.
13.01.2022 / 18:22
MUS apublikavała fota padazravanaha. Jaho vyjava razmytaja, tady jak zvyčajna siłaviki publikujuć foty aryštavanych pa palityčnych spravach adkryta
Raniej infarmacyja pra incydent była tolki ŭ telehram-kanałach, aficyjnych kamientaroŭ nie było.
Paźniej śledčyja orhany dadali taksama infarmacyju, što toj ža mužčyna nočču na 13 studzienia nibyta takim ža čynam paškodziŭ kijosk «Tabakierka» i urnu niedalok ad doma 91 na Staravilenskim trakcie.
Taksama śledstvam nibyta ŭstanoŭlenaja datyčnaść padazravanaha da ździajśnieńnia anałahičnaha złačynstva ŭ Centralnym rajonie Minska ŭ kastryčniku 2020 hoda.
Zatrymanamu mužčynie, pavodle śledčych, 45 hadoŭ, jon raniej nie sudzimy i nidzie nie pracuje, nieadnarazova pryciahvaŭsia da administracyjnaj adkaznaści za raśpićcio śpirtnych napojaŭ i parušeńnie praviłaŭ darožnaha ruchu. Proźvišča jaho nie nazyvajecca, fota taksama pakul što nie publikujucca.
Na miescy jaho žycharstva i ŭ padsobnych pamiaškańniach byli nibyta vyjaŭlenyja «nie mienš za 5 padrychtavanych da vykarystańnia vybuchovych pryład i ŭ vialikich kolkaściach roznyja chimičnyja rečyvy i kampanienty dla ich vyrabu, a taksama daviedačnaja litaratura pa vybuchovych rečyvach, porachach i piratechničnych sastavach».
Fota Śledčaha kamiteta ź miesca žycharstva padazravanaha.
Fota Śledčaha kamiteta ź miesca žycharstva padazravanaha.
Dziejańni padazravanaha kvalifikujucca pa art. 289 (akt teraryzmu, učynieny paŭtorna) Kryminalnaha kodeksa.