У Мінску адкрываюцца калядныя кірмашы з бургерамі і смажанымі слімакамі
Святкаванні і сустрэча Новага года адбудуцца ў Мінску на 19 пляцоўках, цэнтральная — каля Палаца спорту. Ва ўсіх адміністрацыйных раёнах Мінска арганізуюць пераднавагоднія кірмашы. Самыя буйныя з іх пройдуць на Кастрычніцкай плошчы і каля Палаца спорту. Пра гэта паведаміў намеснік начальніка аддзела арганізацыі гандлю і сельскай гаспадаркі ДА «Сталічны гандаль і паслугі» Дзмітрый Пляханаў.
15.12.2021 / 16:51
Фота: depositphotos.com
На Кастрычніцкай плошчы традыцыйны «Калядны кірмаш» адкрыецца ў пятніцу, 17 снежня. Працаваць кірмаш будзе згодна з графікам:
- 17-23 снежня — з 12:00 да 20:00;
- 24-30 снежня — з 12:00 да 23:00;
- у святочны дзень і навагоднюю ноч — з 12:00 31 снежня і да 4:00 1 студзеня;
- у 2022 годзе кірмаш на Кастрычніцкай плошчы будзе працаваць да 14 студзеня ўключна з 17.00 да 20.00 штодня.
У кірмашовых павільёнах на Кастрычніцкай плошчы можна будзе набыць харчовыя і нехарчовыя тавары пераважна беларускай вытворчасці: падарункі, сувеніры, ёлачныя ўпрыгажэнні, падарункавыя наборы. Шырока будзе прадстаўленая прадукцыя ад сталічных кулінараў і кандытараў: гарачыя бліны, дранікі з рознымі начынкамі, стравы з бульбы, свежая выпечка, прысмакі, гарачы шакалад, какава, кава, чай і глінтвейн.
Каб пачаставаць пакупнікоў, якія трымаюць Калядны пост, і для дзяцей падрыхтуюць спецыяльнае меню.
Другая буйная кірмашовая пляцоўка ў цэнтры Мінска традыцыйна размесціцца каля Палаца спорту па адрасе пр. Пераможцаў, 4.
Тут забаўляць і частаваць мінчан і гасцей беларускай сталіцы будуць каля 40 прыватных прадпрыемстваў.
Кірмаш будзе працаваць з 17 снежня па 16 студзеня:
- у буднія дні — з 14:00 да 22:00, а ў выхадныя — з 12:00 да 23:00;
- у навагоднюю ноч «Кірмаш» чакае гасцей да чацвёртай гадзіны раніцы.
У зоне фуд-корта можна будзе пачаставацца дранікамі і блінамі з рознымі начынкамі, смажанымі слімакамі, бургерамі, хот-догамі, шашлыкамі, запечаным мясам, гарачым глінтвейнам.