Pravaabaroncy: niahledziačy na abjaŭlenuju amnistyju, taliby raspraŭlajucca z byłymi siłavikami
Pravaabarončaja arhanizacyja Human Rights Watch paviedamlaje, što bolš za sto byłych afhanskich siłavikoŭ byli zabityja talibami albo źnikli paśla zachopu Afhanistana bajevikami. Čamu nie pracuje abiacanaja Talibanam amnistyja, raźbirajecca BBC.
30.11.2021 / 17:28
Fota:depositphotos.com
Pravaabaroncy kažuć, što, niahledziačy na abjaŭlenuju amnistyju, bajeviki raspraŭlajucca z byłymi siłavikami.
Pradstaŭnik talibaŭ niadaŭna aficyjna zajaviŭ, što ŭ krainie nikoha nie zabivali z pomsty. Ale pravaabaroncy z Human Rights Watch abvinavačvajuć kiraŭnictva Talibana ŭ tym, što jany paturajuć miascovym kamandziram bajevikoŭ i zaachvočvajuć da raspraŭ.
Pavodle spravazdačy arhanizacyi Human Rights Watch, apublikavanaj siońnia, bolš za sto čałaviek byli zabityja ci vykradzienyja ŭ čatyroch pravincyjach Afhanistana — Hanzi, Chiłmiend, Kunduz i Kandahar.
Kali taliby zachoplivali Afhanistan u žniŭni 2021 hoda, paśla vyvadu amierykanskich vojsk u rajonach, jakija dobraachvotna zdavalisia, bajeviki prapanoŭvali siłavikam prajści rehistracyju. Maŭlaŭ, dla taho, kab byłyja siłaviki mahli atrymać listy-harantyi biaśpieki. Ale nasamreč hetyja rehistracyjnyja śpisy ŭžo praź niekalki dzion taliby vykarystali dla taho, kab vyłavić usich byłych siłavikoŭ, aryštavać ich ci pakarać śmierciu.
Taliby taksama atrymali dostup da śpisaŭ supracoŭnikaŭ, jakija pakinuŭ były ŭrad, i heta dapamahło im vyjavić byłych supracoŭnikaŭ pravaachoŭnych vorhanaŭ ci vajskoŭcaŭ.
Patrycyja Hosman, pamočnik dyrektara Human Rights Watch pa spravach Azii, zajaviła, što «ciapier heta zadača Talibana — praduchilić budučyja zabojstvy, pakarać vinavatych i vypłacić kampiensacyi siemjam zabitych».