Малдова ўвяла рэжым надзвычайнага становішча з-за энергетычнага крызісу
Парламент Малдовы прагаласаваў за ўвядзенне ў краіне рэжыму надзвычайнага становішча з-за энергетычнага крызісу. Ён будзе дзейнічаць 30 дзён — з 22 кастрычніка па 20 лістапада.
22.10.2021 / 16:49
Камісія па надзвычайных сітуацыях атрымае права прымаць экстранныя меры, сярод якіх:
- устанаўленне асаблівага паскоранага рэжыму закупкі прыроднага газу, сродкі для гэтага будуць вылучаныя з дзяржаўнага бюджэту;
- увядзенне пры неабходнасці рэжыму рацыянальнага спажывання газу і іншых энергарэсурсаў;
- прыняцце рашэнняў, якія дазваляюць пастаўшчыкам транспартаваць і размяркоўваць прыродны газ па ўсёй краіне;
- каардынаваць дзейнасць СМІ ў дачыненні да інфармавання насельніцтва аб прычынах і маштабах надзвычайнай сітуацыі і прынятых мерах.
Таксама парламентарыі прынялі папраўку аб тым, што рэжым надзвычайнага здарэння не будзе перашкаджаць правядзенню мясцовых выбараў, якія павінны адбыцца 21 лістапада.
З запытам аб увядзенні надзвычайнага становішча звярнулася ў парламент прэм'ер-міністр Наталля Гаўрыліца. 19 кастрычніка яна заявіла, што Малдова сутыкнулася з «сур'ёзным крызісам, звязаным з рэзкім ростам коштаў на газ ва ўсім свеце». Тады ж яна адзначыла, што ўлады краіны вядуць перамовы з расійскім «Газпрамам» для зніжэння цэн на паліва.