Даследчыкі: Чыстка зубоў можа знізіць рызыку цяжкай формы кавіду
Нейкі час таму навукоўцы заўважылі дзіўныя выпадкі кавідных пнеўманій. У пацыентаў з цяжкай формай хваробы чамусьці не было адзнак запалення ў дыхальных шляхах, пры тым што звычайна вірус кавіду якраз пранікае ў лёгкія праз дыхальную сістэму. Зараз даследчыкі выпрацавалі гіпотэзу, якая можа патлумачыць такія сімптомы і, магчыма, нават дапамагчы знізіць рызыку цяжкіх форм хваробы.
27.04.2021 / 21:15
Фота pixabay.com
Каманда навукоўцаў, чыя праца была апублікаваная ў выданні Journal of Oral Medicine and Dental Research, сцвярджаюць, што вірус кавіду, магчыма, здольны пранікаць у арганізм у абыход дыхальных шляхоў. На іх думку, крыніцай хваробы ў такім выпадку робяцца дзясны, у асаблівасці пашкоджаныя праз парадантыт і іншыя хваробы, піша Daily Mail.
Справа ў тым, што хваробы дзясен робяць іх больш чуллівымі да бактэрый і тым больш да вірусаў, якія нашмат меншыя за бактэрыі. Таму мікраарганізмы трапляюць з дзясен у крывяносную сістэму.
Прафесар універсітэта Бірмінгема Іэн Чэпл, адзін з асноўных аўтараў працы, прызнае, што патрэбны новыя даследаванні, каб пацвердзіць гіпотэзу. Калі атрымаецца гэта зрабіць, будзе зразумела, чаму, згодна з іншымі працамі, людзі, якія дрэнна сочаць за гігіенай зубоў і маюць хваробы дзясен, у асноўным маюць больш цяжкія формы кавіду, чым людзі са здаровымі дзяснамі.
Але ўжо зараз можна дапусціць, што выкананне правіл гігіены ратавой поласці можа знізіць рызыку цяжкай формы кавіду. Напрыклад, у гэтым можа дапамагчы чыстка зубоў два разы на дзень як мінімум на працягу дзвюх хвілін і выкарыстанне сродку для паласкання рота.