Šmanaj taksama kupiła apartamienty koštam kala $150 tysiač. Jaje susiedka — lehiendarnaja Halina Žuraŭkova
08.04.2020 / 11:01
Načalnica addzieła dziaržaŭnaha pratakoła prezidenta Biełarusi Dar’ia Šmanaj taksama nabyła sabie apartamienty ŭ «Alimpik Parku» — elitnym žyłym kompleksie na vulicy Ratamskaj z vidam na zakaźnik «Lebiadziny».
Darja Šmanaj, fota «UKantakcie»
U susiednim domie, nahadajem, pasialiłasia pres-sakratarka kiraŭnika krainy Natałla Ejsmant.
Čytajcie. Natałla Ejsmant kupiła apartamienty ŭ «Alimpik Parku» za $167 tysiač
Šmanaj i Ejsmant — siabroŭki, jany časta vystaŭlajuć u instahram sumiesnyja zdymki. Žyłlo kuplali taksama prykładna ŭ adzin čas — u sakaviku 2019 hoda, z roźnicaj u tydzień.
Darja Šmanaj i Natałla Ejsmant, fota z «UKantakcie» Darji Šmanaj
Płošča trochpakajovaj kvatery Šmanaj — 99,4 mietra. Kvatery ŭ hetym i susiednim damach «Tapas» pradavaŭ pa $1500-1700 za kvadratny mietr. Jašče kala $15 tysiač kaštavała mašynamiesca.
«Alimpik Park», fota Nadziei Bužan
Dar’ia Šmanaj naradziłasia ŭ 1993 hodzie. Jana skončyła BDEU pa śpiecyjalnaści «buchhałtarski ŭlik, analiz i aŭdyt u handli i hramadskim charčavańni». U 2013 Šmanaj pieramahła ŭ konkursie pryhažości «Karaleva Viasna» i nieŭzabavie pačała supravadžać Alaksandra Łukašenku na mierapryjemstvach. Stała aficyjnaj rabotnicaj słužby pratakoła prezidenta.
«Što tyčycca Daški, pra jakuju voś havorka išła, tak ja jaje ŭžo 2 hady viedaju, — raskazvaŭ Łukašenka ŭ interv’iu Ksienii Sabčak u 2014 hodzie. — Jana pracuje, vielmi prystojnaja dziaŭčyna! Kali b u mianie takaja była dziaŭčyna, nu słuchaj, heta… heta vyšej za dach».
Jakija viadomyja biełarusy stali susiedziami Šmanaj?
«Naša Niva» ŭžo pisała pra eks-kiraŭnika Minščyny i Hrodzienščyny Siamiona Šapiru.
Čytajcie. Siamion Šapira raskazaŭ, jak staŭ haspadarom dźviuch kvater u elitnym «Alimpik Parku» ahulnym koštam kala $250 tysiač
Taksama kvateru nabyła 68-hadovaja Halina Žuraŭkova — lehiendarnaja eks-kiraŭnica spraŭ prezidenta.
U pačatku 2000-ch uznačalvała biznes-impieryju, jakaja padparadkavała sabie cukrovy, tytuniovy i naftavy rynki krainy. U 2004 hodzie Žuraŭkovaj prysudzili 4 hady źniavoleńnia za kradziež $3,6 miljona — ale praz paru miesiacaŭ Łukašenka amnistavaŭ jaje, i jana nazaŭždy źnikła z biełaruskaha palityčnaha haryzonta.
Halina Žuraŭkova
Ciapier Žuraŭkova nabyła kvateru ŭ elitnym domie na Ratamskaj. Pryčym svaich hrošaj amal nie było, «Tapas» aformiŭ rasterminoŭku na $95 tysiač.