У Гродне вырашылі спрэчнае пытанне пра форму купала вежы ля ўязной брамы Старога замка
17.05.2019 / 01:42
Першапачаткова беларускія архітэктары ў выбары формы купала кіраваліся выявай замка на гравюры Тамаша Макоўскага, якая была створана ў 16-17 стагоддзях. Пасля візіту польскай дэлегацыі ў кастрычніку мінулага года, у якую ўвайшлі прадстаўнікі міністэрстваў культуры, мастацтвазнаўцы, рэстаўратары і праекціроўшчыкі, паступіла прапанова не спяшацца з вырабам раней зацверджанага купала. Яго форма падалася замежным экспертам занадта выпуклай, круглявай, што не ўпісвалася ў іх разуменне архітэктурных традыцый замкавага будаўніцтва таго часу.
— У лістападзе 2018 года мы атрымалі ад польскага боку графічныя прапановы і іх абгрунтаванні. Яны былі ўлічаны праектнай арганізацыяй пры дапрацоўцы дакументацыі па форме «брамнай» вежы. Сёння гэтае спрэчнае пытанне ўжо вырашана з улікам прапаноў польскіх спецыялістаў, — падкрэсліла начальнік упраўлення культуры Гродзенскага аблвыканкама Алена Клімовіч.