Фота: сацсеткі
«Меў надзею, што ўсё абыдзецца»
Па адукацыі 49-гадовы Віталь Брагінец фізік, але заўсёды жыў правам.
«Чаму ён стаў менавіта адвакатам, не казаў, але вельмі часта згадваў, што мае фізічную адукацыю, — расказвае яго калега. — Віталь разумны і настойлівы. Яму не важна, што пра яго думаюць іншыя, будзе рабіць так, як ён лічыць правільным. Заўсёды страецца зразумець іншых людзей і шкадуе іх.
Здаецца, Віталь ніколі не думаў пра тое, каб з’язджаць. Больш за тое, ён, будучы чалавекам, які разбіраецца ў законах, разумеў, што нічога не парушыў. Хаця ведаў, што ў краіне не да законаў».
Віталь — фанат права і закона. Юрыдычнай справай ён займаўся больш за 25 гадоў. Гэта было яго працай і хобі. З 1996 па 2010 год ён узначальваў уласную кампанію «Брагінец і партнёры». Апошнім часам працаваў у юрыдычнай кансультацыі Дзяржынскага раёна.
«Ёсць юрыдычныя працэдуры, якія працуюць па пэўнай практыцы. Нават не заўсёды задумваешся, робіш, як яно ёсць. А Віталь быў з тых, хто чытаў, як гэта напісана ў законе, і дамагаўся, каб гэта так і было, а не па адпрацаваных схемах. Таму не ўсе ў юрыдычнай супольнасці яго разумелі.
У нас як? Зрабіць хутка і эфектыўна. А ён увесь час казаў, што мы не павінны самі сабе ствараць нейкія абмежаванні.
Напрыклад, юрысты часам, калі ў законе не сказана, што гэта нельга, самі сабе прыдумляюць, што так і ёсць. Віталь настойваў на тым, што калі не сказана «нельга» — значыць магчыма.
Многіх ён раздражняў сваёй настойлівасцю. Але гэта характарызуе яго як фаната сваёй справы».
З хобі адваката — ён вырошчваў авакада, саджаў косткі іншых раслін. У яго дома засталася цэлая аранжарэя. Цяпер яе даглядае сябар.
Віталь таксама любіў ёгу.
За час зняволення, кажуць, Брагінец вельмі схуднеў.
«І так быў хударлявы, я нават не ведаю, як яшчэ больш пахудзець ён змог», — кажа калега.
Па лістах, якія прыходзілі ад Віталя, было зразумела, што ён вельмі здзіўлены справе, якую яму прад'явілі.
«Меў надзею, што ўсё абыдзецца, — кажа калега. — Расказваў, што яшчэ ў самым пачатку ён упаў з ложка з другога паверха і пашкодзіў нагу.
Думаю, што так жорстка з ім абышліся з-за яго прынцыповасці. Выносіў мозг шмат каму з сілавікоў. Хутчэй, вырашылі правучыць такім чынам. А таксама гэта зрабілі пэўнай паказальнай справай для ўсіх адвакатаў. Пасыл, каб сядзелі ціха, і рабілі так, як кажуць».
«Умее радавацца чужым поспехам»
Другі калега апісвае Віталя як «вельмі ўпартага і самааданага». Па кожнай справе ён рабіў усе мажлівыя крокі, каб дапамагчы кліентам, за якіх моцна перажываў.
«Шукае і знаходзіць розныя нестандартныя рашэнні, якія сапраўды дапамагаюць. Суддзі і следчыя адчувалі ўжо з самага пачатку, што лёгка ім не будзе, кожная іх памылка і злоўжыванне будзе заўважана», — кажа ён.
Для Віталя было важна змагацца да апошняга. Ён абскарджваў кожнае неправамернае рашэнне суда.
«З ім было вельмі проста камунікаваць. Нават з тымі, хто значна маладзейшы за яго, ён ніколі не размаўляе з пазіцыі «ў мяне шмат досведу, а ў цябе — не», «я ведаю, што такое быць адвакатам, а ты не», што можна пачуць ад шматлікіх дасведчаных адвакатаў. Таксама ён умее радавацца чужым поспехам, а не толькі сваім.
Памятаю, як у 2020 годзе ён прыйшоў на адзін мой працэс па адміністрацыйнай справе, каб падтрымаць і для сябе таксама пачуць нешта новае. Атрымалася дамагчыся адпраўкі справы на дапрацоўку, пасля чаго майго кліента вызвалілі. Яго прысутнасць сапраўды была карыснай і дадала ўпэўненасці», — расказвае калега.
«Кайфаваў, калі гаварыў па-беларуску»
Цікавы эпізод згадвае журналіст, з якім Брагінец хадзіў на допыт.
«Брагінец змагаўся за кожную коску і слова ў пратаколе допыту.
Зрабіў заўвагу, што паказанні даваліся па-беларуску, а следчы, магчыма, не мае кампетэнцыі, каб свабодна перакладаць мае словы. Кайфаваў, што са мной можна гаварыць па-беларуску, бо баяўся, што ўжо забывае мову»,
— напісаў у фэйсбуку Зміцер Панкавец.
Віталя Брагінца абвінавацілі па чатырох артыкулах Крымінальнага кодэкса: аб распальванні варожасці, закліках да дзеянняў супраць нацбяспекі, стварэнні экстрэмісцкага фармавання або ўдзеле ў ім і грубым парушэнні парадку. Справу два тыдні ў закрытым рэжыме разглядала суддзя Алена Ананіч, паведамляла «Вясна».
Адваката Віталя Брагінца затрымалі 23 мая 2022 года і двойчы запар арыштавалі на 15 сутак.
Артыкул аб удзеле ў экстрэмісцкім фармаванні ў яго справе ўзнік верагодна пасля таго, як 9 верасня 2022 года МУС прызнаў «экстрэмісцкім фармаваннем» тэлеграм-чат «Беларускiя адвакаты».
Брагінец абараняў некаторых палітвязняў, у тым ліку старшыню праваабарончага цэнтра «Вясна» Алеся Бяляцкага, а таксама адваката Андрэя Мачалава, які на судзе застаўся без абароны праз арышт Брагінца.
Напісаць Віталю ліст са словамі падтрымкі можна на адрас:
СІЗА-1, 220030, г. Мінск, вул. Валадарскага, 2, Брагінец Віталь Фёдаравіч.
Чытайце таксама:
«Каля 120 адвакатаў вырашылі не працягваць сваю дзейнасць»
«Неслі плакат і палотнішча бел-чырвона-белага колеру, блакавалі шлях транспарту» — яшчэ адзін прысуд па «народным» артыкуле
Сябровак у Мінску асудзілі за знявагу дзяржаўнага сцяга
