Грамадзянка Расіі Сафія Сапега, затрыманая вясной 2021 года разам з Раманам Пратасевічам пры пасадцы ў Мінску самалёта авіякампаніі Ryanair, адбывае шасцігадовы тэрмін у калоніі за адміністраванне тэлеграм-канала «Чорная кніга Беларусі».
Раней паведамлялася, што першы этап працэдуры памілавання дзяўчына, якая падчас следчых дзеянняў заключыла пагадненне са следствам, прайшла і да канца 2022 года магла быць вызваленая.
«Адміністрацыя калоніі дала станоўчае заключэнне па хадайніцтве Сафіі і прызнала, што ёю прынятыя ўсе меры для звароту па памілаванне. Далей яго будзе разглядаць камісія па пытаннях памілавання пры Лукашэнку, на гэта можа сысці каля 3 месяцаў», — сказаў тады Антон Гашынскі.
Сапега падала прашэнне Лукашэнку праз адміністрацыю жаночай калоніі ІК-4 у Гомелі ў канцы чэрвеня 2022 года. Згодна з указам Лукашэнкі, камісія ўлічвае меркаванне адміністрацыі калоніі, а таксама характар, цяжар і ступень грамадскай небяспекі здзейсненага злачынства, асобу асуджанага, яго паводзіны, стаўленне да працы, удзел у самадзейнасці, тэрмін адбытага пакарання, пакрыццё нанесенай шкоды і іншыя абставіны.
