Пра выпадак распавяла начальнік аддзела пракуратуры Мінска па наглядзе за адпаведнасцю закону судовых пастаноў па грамадзянскіх справах Віталія Грыцаль, пішуць «Мінск-навіны».
Некаторы час таму індывідуальны прадпрымальнік даў пазыку 7 тысяч рублёў пад працэнты. Грошы пазычыў непрацуючы інвалід 3-й групы. У ролі закладу была кватэра ў Мінску. Яе ацанілі ў 60 тысяч рублёў.
— Кабальныя ўмовы фактычна пазбавілі пазычальніка магчымасці пагасіць доўг. З улікам працэнтаў, пені і штрафу з даўжніка на карысць індывідуальнага прадпрымальніка павінна было быць спагнана звыш 140 тысяч рублёў. Гэта ў 20 разоў больш за першапачатковую пазыку, — расказала Грыцаль.
Даўжнік неўзабаве памёр. Абавязацельствы па вяртанні грошай перайшлі на яго маці. Ёй таксама выставілі пазоў аб звароце спагнання на закладзеную кватэру, у якой яна пражывала.
— Пракуратурай па паказаным факце прынятыя меры рэагавання. У цяперашні час здзелкі, якія адбыліся, аспрэчаныя ў судзе, — дадала Грыцаль.
