Фота з інстаграма Лаліты Мацкевіч
На днях 20-гадовая Лаліта Мацкевіч выклала фатаграфію, на якой трымае букет і цалуецца з Недасекавым.
Між тым яшчэ не прайшло і года з дня вяселля Максіма Недасекава і Дар'і Батаговай.
Жонкай актыўнага прыхільніка дыктатуры стала пераможца юніёрскіх чэмпіянатаў Беларусі. Дзяўчына выступала за Гродзенскую вобласць і ўдзельнічала адразу ў некалькіх дысцыплінах — скачкі ў даўжыню, трайны скачок і бег на кароткія дыстанцыі.
«Раней яна займалася [спортам], па спорце і пазнаёміліся даўным-даўно. Даўняе каханне? Будзем казаць так. Даўняе, але адбылося ўсё гэта не так ужо моцна і даўно», — так каментаваў Недасекаў сваё знаёмства з нявестай перад вяселлем.
Пара абмянялася кольцамі не ў ЗАГСе, а ў менш афіцыйнай абстаноўцы ў рэстаране.
Аднак, здаецца, моцнай сям'і маладой пары стварыць не ўдалося. Яшчэ месяц таму лёгкаатлет выяўляў актыўнасць у каментарах у Лаліты Мацкевіч у інстаграме.
Лаліта ў свой час займалася мастацкай гімнастыкай у групавых практыкаваннях і з'яўляецца майстрам спорту міжнароднага класа, прызёрам чэмпіянату Еўропы — 2017 сярод юніёрак і ўладальнікам золата чэмпіянату Беларусі-2019. Адно з апошніх міжнародных спаборніцтваў дзяўчыны — Гран-пры Масквы — 2020, дзе было заваявана срэбра.
Дзяўчына вырасла ў спартыўнай сям'і: яе дзед быў майстрам спорту СССР па спартыўнай гімнастыцы, а тата займаўся веласпортам. У мастацкую гімнастыку бацькі аддалі дзяўчынку, каб выправіць яе паходку. З часам Лаліту спорт зацягнуў, прыйшлі першыя поспехі. Асабліва яркія ўспаміны ў дзяўчыны засталіся ад першых дзіцячых спаборніцтваў, дзе яна выканала ролю малпачкі.
«Вельмі добра памятаю першае выступленне на Baby Cup. Мы выступалі з сяброўкай Ксюшай, і я была малпачкай. У нас былі кошыкі з бананамі, і проста падчас выступу трэба было іх есці», — распавядала Лаліта.
Мацкевіч, у адрозненне ад жонкі Недасекава (ужо, мабыць, былой), знаходзіцца ў ліку падпісантаў праўладнага ліста. Але ў сацсетках дзяўчаты не знайсці асаблівай любові да рэжыму Лукашэнкі, як і якіх-небудзь выказванняў пра падзеі 2020 года і вайну ва Украіне.
Як даўно сустракаецца новая пара і ці расстаўся Недасекаў з жонкай канчаткова, невядома. Дар'я адкрыла свой профіль у Instgram, і там не засталося ніякіх слядоў ад атлета. З апошняга ў дзяўчыны на старонцы аднатыпныя фатаграфіі без подпісаў.
