Чыноўнік сцвярджае, што яго распараджэнне пра замежныя камандзіроўкі датычыць толькі дзяржпрадпрыемстваў.
Фота «Газеты Слонімскай».
Старшыня Гродзенскага аблвыканкама Сямён Шапіра ў інтэрв’ю «Комсомольской правде» пракаментаваў акалічнасці прыняцця распараджэння № 227р «Аб парадку выезду ў службовую камандзіроўку за мяжу». Па яго словах, яго
рашэнне датычыць, толькі тых кіраўнікоў, што працуюць на дзяржаўнай службе і атрымліваюць заробак з бюджэту.Наяўнасць у распараджэнні фармулёўкі «незалежна ад ведамаснай падпарадкаванасці і формы ўласнасці» кіраўнік вобласці патлумачыў тым, што супрацоўнікі апарата аблвыканкаму маглі перастарацца.
Нагадаем, што 4 лістапада 2010 г. з’явілася распараджэнне № 199р «Аб парадку паведамлення па выездзе ў службовыя камандзіроўкі за мяжу» за подпісам старшыні аблвыканкаму. Згодна яго кіраўнікі прадпрыемстваў мусілі загадзя папярэдзіць аблвыканкам пра запланаваны выезд за мяжу па службе. 16 снежня было прынятае распараджэнне № 227р, якое скасоўвала папярэдні дакумент. Новае рашэнне было размешчана на сайце аблвыканкаму ў раздзеле «Афіцыйныя дакументы» (11 студзеня яго знялі з сайту). У ім гаварылася, што яно прынята «ў мэтах забеспячэння стабільнай працы арганізацый, размешаных на тэрыторыі Гродзенскай вобласці».
Згодна распараджэння, для атрымання дазволу на выезд на імя старшыні аблвыканкама неабходна прадставіць ліст з указаннем звестак пра дзяржаву і тэрмінах камандзіравання, мэты – і крыніцы фінансавання камандзіроўкі. Кантроль за выкананнем дадзенага распараджэння ўскладзены на Камітэт эканомікі аблвыканкаму. Сюды па выніках камандзіроўкі кіраўнікі арганізацый ў 10-дзённы тэрмiн мусяць даслаць інфармацыю аб выніках камандзіроўкі, у тым ліку пра яе эфектыўнасць.
Скандальная ініцыятыва Сямёна Шапіры нарабіла шуму. Вось як яго пракаментаваў для «Нашай Нівы» праваабаронца Гары Паганяйла:
«Гэтае распараджэнне пасягае на канстытуцыйнае права грамадзянаў на свабоду перамяшчэння, а таксама супярэчыць палажэнням Міжнароднага пакта аб грамадзянскіх і палітычных правах, да якога далучылася наша краіна».Паганяйла лічыць гэта спробай наладжвання татальнага кантролю за любымі працэсамі ў рэгіёне. «У дачыненні да прыватных арганізацый такія захады былі б проста непрымальнымі і незаконнымі». Праваабаронца робіць прагноз, што ініцыятыва Шапіры не атрымае ніякага эфекту.
Нагадаем, што ў свой час Аляксандр Лукашэнка ўвёў норму, паводле якой найвышэйшыя чыноўнікі павінны ўзгадняць у Адміністрацыі прэзідэнта любы свой выезд за мяжу.
